Willie: KPLB ngemendarka RM500,000 kena ngangkatmanah jalai kebun ba BRS di Padawan
KUCHING: Sapit Menteri Industri enggau Komoditi Datuk Willie Mongin madahka sepenyampau RM500,000 udah dikemendar Opis Menteri Menua Pesisir (KPLB) kena bejalaika renggat kedua projek ngangkatmanah jalai kebun ba Skim Palan Pengentap Pendiau Baru Bengoh (BRS) di Padawan ditu.
Ku iya madah, projek tu iya nya projek nangkanka renggat keterubah ti udah tembu November taun nyin kemari ti beungkus RM500,000.
“Bisi RM1 juta deka dipelanja ungkup projek ngangkatmanah jalai kebun semanjai 2.5 km di BRS.
“Projek ari baruh Projek Jalai Penyambung KPLB tu dipelaba tembu semua nya dalam tiga bulan deka meri pemaik ngagai peranak ba empat genturung pendiau ditu (BRS) iya nya Genturung Pendiau Taba Sait, Semban, Pain-Bojong enggau Rejoi kena sida ke kebun diri empu,” ku iya.
Iya madah munyi nya lebuh ti bejaku ba pengerami nyuaka kunterik ungkup renggat kedua projek nya ba Dewan BRS, Padawan kena Hari Enam tu tadi.
Beserimbai enggau nya dalam pengerami bukai iya nya bejadi Jematai Nyien enggau Jalai Majerin di Genturung Pendiau Patung,
Padawan, Willie ke mega Kaban Parlimen Puncak Borneo madahka komitmen ketuai komuniti enggau ketuai bansa begulai enggau pengari rayat sereta perintah endang beguna dalam pengawa mantu rayat ari bemacham aspek.
Ku iya, ketuai komuniti enggau ketuai genturung pendiau ulih meda enggau dampih dalam genturung pendiau diri empu lalu mai pekara nya ke palan servis iya ngmbika ulih diputarka lengkas.
“Aku minta ngambika sida suah agi betemu enggau aku empu sereta pemesai ba Palan Servis Rayat lalu berandauka mayuh macham pekara bekaul enggau penanggul komuniti,” ku iya.
Bekaul Jematan Nyien, iya ngarapka perengkaguna ba Projek Mesra Rakyat (PMR) nya deka bulih pemaik ngagai komuniti dalam bemacham pengawa.
Ba pengerami nya iya udah madahka agih belanja sepenyampau RM20,000 ungkup tabung Komiti Pemansang enggau Pengelikun Genturung Pendiau (JKKK) Genturung Pendiau Patung, RM30,000 ngagai Biro Orang Indu genturung pendiau nya sereta nyuaka bantu ngagai 13 iku pesakit enggau orang timpang pendiau (OKU) di kandang endur nya.