Rumah panjai di Poyut, Lubok Nibong deka bisi bekal ai beresi sebedau Gawai Dayak
MARUDI: Peranak rumah panjai ba kandang menua Poyut enggau Lubok Nibong, ditu deka bisi bekal ai beresi sebedau Gawai Dayak taun tu.
Kaban Kunsil Nengeri Mulu, Datuk Gerawat Gala madah projek nyendiaka bekal ai beresi nya ngena ungkus urung RM38 juta.
“Semua, 32 rumah panjai di Poyut enggau Lubok Nibong deka ulih pemaik ari projek nya.
“Enti projek tu udah tembu digaga, peranak rumah panjai enda agi bepanggai ba ai ujan enggau sungai ke dikena sida ninting hari,” ku iya lebuh ke nemuai seraya kereja ngaga lima buah rumah panjai di Poyut Nibong, ensanus.
Projek bekal ai beresi tu udah dikemendarka perintah Barisan Nasional ba taun 2018, lalu tinda ungkup projek nya dikeluarka Opis Menteri Pemansang Menua Pesisir enggau Kandang Menua sebedau Pilihan Bepilih Besai (PRU) Ke-14.
Gerawat ke mega Sapit Speaker DUN madah, pengudah Pakatan Harapan (PH) megai perintah besai, tinda projek nya dikinsil.
“Udah nyam Perintah Gabungan Parti Sarawak (GPS) lalu ngambi projek nya.
“Enti tinda nya enda dikinsil, projek tu enti nitihka temb u digaga taun siti nyin tadi.
“Tu nyata mandangka GPS ngemeratka pemansang perengkaguna rayat di menua pesisir,” ku iya.
Berebak enggau nya, iya ngarapka rayat ba kandang menua Poyut enggau Lubuk Nibong terus meri sukung penuh ngagai perintah GPS ti betuaika Kepala Menteri Datuk Patinggi Abang Johari Tun Openg, ti udah nyata ngembuan rikod ti manah sereta nyulut.
Dulu ari nya, Gerawat udah nemuai ngagai Rumah Tanjong di Sungai Stapang B, Rumah Jamit di Stapang A, Rumah Umbar Melinda di Sungai Melikat, Rumah Sigan di Sungai Muam enggau Rumah Michael Bigol di Logan Entasan B, Poyut dan
Lubok Nibong.
Iya mega ngelalau peranak di rumah panjai ngambika ngerejista diri ngambika dituchuk vaksin COVID-19 sereta nitihka prosedur operasyen standard (SOP).
Gerawat mega bisi nyuaka chek Projek Mit Pemansang Menua Pesisir (MRP) enggau Projek Transformasyen Menua Pesisir (RTP).