Ngangkatka tikas pengelikun ba ICQS Lubok Antu: KM
Ngena teknologi baru nagang penama orang enda beradat ke nengeri tu laban Indonesia, Malaysia (Sarawak) kelalu semak
“
Nya alai kitai deka berandau baka ni kitai deka ngemanahka agi gaya ba endur tu (Lubok Antu). Tu siti penerang ke pemadu beguna ba kami, laban ari tu perintah nengeri ulih ngiga chara mantu nyengkaum mantu raban pengelikun baka ba senentang aset ke patut
” dikemanahka agi.
Datuk Patinggi Abang Johari Tun Openg
Kepala Menteri
KUCHING: Perintah nengeri deka ngiga chara ngemanah sereta ngangkatka agi tikas pengelikun ba garis entarabansa enggau Indonesia nyengkaum ba ICQS Lubok Antu, ti ngena teknologi baru.
Kepala Menteri Datuk Patinggi Abang Johari Tun Openg madah, chara ngemanahka agi tikas pengelikun nya disadang ulih nagang penama orang enda beradat (PATI) ke nengeri tu berindik ari Indonesia enggau Malaysia (Sarawak) kelalu semak.
Iya madah pekara nya deka diperatika enggau silik, laban baka Lubok Antu (Malaysia) enggau Indonesia jalai alun endang berimbai.
“Nya alai kitai deka berandau baka ni kitai deka ngemanahka agi gaya ba endur tu (Lubok Antu). Tu siti penerang ke pemadu beguna ba kami, laban ari tu perintah nengeri ulih ngiga chara mantu nyengkaum mantu raban pengelikun baka ba senentang aset ke patut dikemanahka agi.
“Diatu orang ngena telefon binching, enti kitai enda ngena teknologi tang orang bukai ngena teknologi kitai deka tinggal. Nya alai tu siti
chara ti deka diperati kitai,” ku iya.
Abang Johari mansutka pekara nya lebuh bejaku ba pengerami Nemuai Seraya Bejalaika Pengawa ngagai Pelilih Menua Lubok Antu ti diatur ba Dewan Sukan, Kompleks Sukan Lubok Antu ba Lubok Antu kemari.
Nambahka nya, perintah nengeri deka berandau sereta bekerejasama enggau menua Indonesia sentang chara mutar sereta nagang penama orang enda beradat (PATI) ke Sarawak, kena nyaga pengerai enggau pengelikun di nengeri tu.
Kemari, iya nemuai seraya bejalaika pengawa ngagai ICQS Lubok Antu laban deka ngemanah sereta ngangkatka agi faktor pengelikun ba endur nya.
“Laban apin lama maya aku ngelawa Kem Imigresyen di Semuja, mayuh orang ke ditan sida Imigresyen ba endur nya nyengkaum sida ke tama enda beradat (PATI) ke Sarawak.
“Maya ba Semuja mayuh PATI, kereban enda chukup lalu sida besekut ngujungka sida kelalu semak enggau pangan diri, palan kuarantin enda chukup dalam siti bilik bisi 20 iku, bekunsi bilik siti mandi, nya alai engka tu kebuah penyakit nya jampat berampit ti ngujungka penyampau orang positif COVID-19 nambah ngenyit.
“Nya alai penatai kami tu deka meda baka ni ulih nyaga sida ke deka ngiga rejeki bekereja ditu enggau mega baka ni chara kitai ulih ngurangka pengelekai COVID-19,” ku iya.
“Lebuh kitai berandau engka kitai deka ngiga jalai baka ni nagang PATI lalu siti chara iya nya jalai chit,” ku iya.
Nyebut pekara ba aum pengarang berita, iya madahka Sarawak bisi garis entara menua ti panjai lalu orang ari menua sepiak ulih tama sekalika tama nengah pintu ke betul tauka pintu ke salah.
“Kitai deka nempa kerejasama (enggau Indonesia), meda baka ni kitai deka neritka agi penama sida awakka ulih datai nengah pintu ti betul sereta patut nitihka prosedur operasyen standard (SOP) ti ditetapka kitai kelebih agi maya pandemik tu,” ku iya.
Bekaul enggau penemuai seraya bejalaika pengawa kemari, Abang Johari mendingka penerang ari mayuh bengkah ejensi ba Bilik Aum Kompleks Imigresyen, Kastam, Kuarantin enggau Pengelikun (ICQS) Lubok Antu/Nanga Badau.
Udah nya ngabas seraya meda kereban ba ICQS Lubok Antu/Nanga Badau seraya nyuaka Bakul Pemakai ngagai raban terabai menua ba endur nya.
Kelimpah ari nya Abang Johari mega bisi ngabas Projek Rakyat ‘Waterfron’ Lubok Antu, Sri Aman sebedau ngelawa Dewan Sukan, Kompleks Sukan Lubok Antu.
Sama bisi kemari, Sapit Kepala Menteri ti mega Menteri Infrastruktur enggau Pemansang Palan Penyangkai Kapal Tan Sri Datuk Amar James Jemut Masing; Menteri Muda Pemansang Industri ti mega Kaban Kunsil Nengeri Batang Ai Datuk Malcom Mussen Lamoh, Sekretari Perintah Nengeri Datuk Amar Jaul Samion enggau sida ke bukai.