Lubok Antu tau nyadi palan negapka kaul dagang enggau Indonesia
KUCHING: Lubok Antu bisi potensial nyadi palan neritka kaul dagang entara Sarawak (Malaysia) enggau Indonesia, berindik ari pekara nya pemansang infrastruktur ba kandang menua nya deka dikemanahka agi.
Kepala Menteri Datuk Patinggi Abang Johari Tun Openg madah, tambah mega kenyau ari taun 2012 nyentuk ke diatu nengeri tu endang udah nempa kerejasama enggau Indonesia nengah kerejasama Kalimantan Barat enggau Sarawak ba garis entara menua.
Siti pekara ti dikedeka enggau ulih dipeda iya nya, potensial Lubok Antu enggau kandang endur ngelingi tu lebuh bisi penambah jalai enggau pengawa dagang entara kitai enggau bala bakih kitai di Badau sereta Kalimtan enggau Nengeri Sarawak, ku iya.
“Aku meda kerejasama kitai chukup rapit enggau menua sepiak sereta nya kebuah mega kitai ulih meda jemah ila ICQS (Lubok Antu) tu, ti berengkah taun 2012 ngagai 2021 deka bisi dipeda penambah ba kaul dagang nyengkaum ba minyak sawit.
“Penatai aku kitu iya nya deka meda data ke bisi lalu udah nya kitai merambu nama ke patut dipejalai sereta patut dikemansangka begulai enggau menua sepiak kitai.
“Reti nya mayuh infrastruktur ba kandang menua tu (Lubok Antu) patut dikemanahka agi,” ku iya.
Abang Johari mansutka pekara nya lebuh bejaku ba pengerami Nemuai Seraya Bejalaika Pengawa ke Pelilih Menua Lubok Antu ti diatur ba Dewan Sukan, Kompleks Sukan Lubok Antu ba Lubok Antu kemari.
Entara pemansang infrsturktur ti deka dikemanahka gai nyengkaum nyendiaka lampu jalai ti sepenyauh urung 7.5 kilometer ari Lubok Antu ngagai ICQS Lubok Antu.
“Tang ke pemadu beguna enti deka ngemansangka kandang endur tu (Lubok Antu), endang patut kitai ngemanahka agi infrastruktur jalai.
“Maya aku nyadi kepala menteri, aku udah ngemendarka mayuh jalai ba (sitak) Batang Ai tu sereta ukai ngetu naka tu aja, kitai deka terus ngemansangka jalai sereta infratruktur bukai ditu.
“Aku mega meda bisi penambah ba pengawa ngeluarka simen enggau kereban ungkup kereja konstraksyen nengah Lubok Antu, nya alai kitai deka ngemeratka nama ke patut dikena kitai ngemansangka kandang endur nya,” ku iya.
Nambahka nya, iya madahka perintah nengeri deka ngiga chara ngeksport barang ari Lubok Antu terus ke palan penyangkai kapal, ngena kargo sereta patut ngemanahka agi enggau ngemansangka ‘in line for trade’ nyema kargo betambah di Lubok Antu.
“Reti nya Lubok Antu majak nambah enggau ari sukut data dipelabaka kandang endur tu deka nyadi siti agi pintu penama terus ke tengah menua nengeri Sarawak.
“Ngena data enggau penerang tu, aku deka mansik sereta masukka ngagai polisi ‘post pandemic exit economic strategic’ ti meri penguntung ngagai Lubok Antu enggau kandang endur ngelingi, kelimpah ari telekomunikaysen mega patut dikemanahka agi kena meri awak ngagai ekonomi lebih mansang.
“Tu mih kebuah penatai aku kitu, kitai enda tau enda berunding panjai laban bakih menua sepiak kitai deka nyadi indu menua. Enti pemansang bejalai ba emua sepiak enggau tentu bisi tama ngagai ekonomi kitai,” ku iya.
Nama ke pemadu beguna ku iya, penyerakup enggau bala pemesai patut diberi timpuh merambu enggau ngemansangka menua ti meri penguntung ngagai rayat.
Bekaul enggau peminta Menteri Mudah Pemansang Industri ti mega Kaban Kunsil Nengeri (ADUN) Batang Ai Datuk Malcom Mussen Lamoh ti minta digaga jematan dikena nyambung genturung pendiau enggau Watarefront Lubok Antu, Abang Johari udah ngemendarka jematan nya.