COVID-19: 153 kes baru COVID-19, dua kes pemati kemari
KUCHING: Sarawak kemari bisi ngerikodka 153 kes baru COVID-19 enggau dua kes pemati ketegal rampit COVID-19.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madah, nya ngujungka penyampau kes positif COVID-19 ba nengeri tu nambah nyadi 16,214 kes enggau kes pemati ketegal COVID-19 nambah nyadi 107 iku naka kemari.
“Sehari tu bisi 153 kes baru COVID-19 ditemu ba Sarawak. Pelilih menua ti ngeripotka kes nyengkaum Peliluh Menua Sibu (40), Miri (33), Kuching (20), Bintulu (18), Meradong (11), Marudi (6), Beluru (5), Julau (4), Tanjung Manis (4), Sarikei (3), Subis (3), Sri Aman (3), Samarahan (2) enggau Sebauh (1).
“Ari penyampau 153 kes baru ti diripotka nya, bisi 17 iku udah ngayanka tanda enggau bisi tanda dirampit COVID-19 maya pengawa meresa dipejalaika.
“Lalu ari penyampau semua 153 kes baru nya mega nyengkaum bisi 80 kes asil meresa individu ke bisi kontak semak enggau kes positif COVID-19 (tiga) bisi tanda); 30 kes beperesa bukai ba fasiliti pengerai; 25 kes iya nya asil meresa individu dalam kluster aktif ke udah bisi (siku bisi tanda); 13 kes asil ari meresa individu bisi tanda ba fasiliti pengerai; empat (4) kes bekaul enggau individu pulai ari nengeri bukai dalam Malaysia ti dikategori nyadi kes Import B enggau siti (91) kes bekaul enggau individu pulai ari luar menua (Import A) iya nya ari menua Holland,” ku JPBNS, kemari.
Bekaul enggau dua kes pemati baru ketegal rampit COVID-19, JPBNS madahka dua kes nya bekaul enggau lelaki peranak menua (Sarawak) ti beumur 33 enggau 61 taun.
“Kes pemati ke-106 iya nya kes ke-15,961 siku lelaki peranak menua (Sarawak) beumur 33 taun ti udah diperubat ba Sepital Miri laban sendat seput. Kes bisi batuk sehari sebedau berubat ba sepital.
“Kes diperesa COVID19 ngena rT-PCR sereta ditemu positif kena 28 Mac 2021. Tikas pengerai kes maja enda manah sereta ditetapka udah nadai kena 28 Mac 2021. Kes bisi komorbid penyakit darah tinggi.
“Kes pemati ke-107 iya nya kes ke-14,029 siku lelaki peranak menua (Sarawak) beumur 61 taun ti udah diperubat ba Sepital Bintulu pengudah pengawa meresa kontak semak ngena peresa rT-PCR ditemu positif kena 20 Mac 2021,” ku JPBNS.
Tikas pengerai kes ke107 ku JPBNS, majak enda manah sereta ditetapka udah nadai kena 30 Mac 2021 sereta kelimpah ari nya kes bisi ko-morbid penyakit darah tinggi enggau kemi manis.
Komiti (JPBNS) meri penyinu ati ngagai orang ke sebilik enggau kes pemati ketegal COVID-19 nya.
Berebak enggau tu, JPBNS kemari mega ngeripotka bisi 211 kes baru udah gerai sereta dikemendarka pansut ari Sepital Miri (63), Sepital Bintulu (32), Sepital Besai Sarawak (30), Sepital Sibu (29), PKRC Sepital Sri Aman (18), PKRC Betong (18), PKRC Sepital Kapit (7), Sepital Sarikei (5), PKRC Mukah (5) enggau PKRC Serian (4).
Tu ngujungka penyampau semua kes positif COVID-19 udah gerai sereta dikemendarka pansut ari sepital nambah nyadi 13,255 iku tauka 81.75 peratus ari penyampau semua kes COVID-19 ba Sarawak.
Naka kemari mega bisi 158 PUI baru diripotka enggau bisi siti 91) PUI ti agi nganti pemutus peresa makmal.
Kelimpah ari nya, JPBNS kemari ngeripotka Pelilih Menua Tanjung Manis udah betukar status ari Kuning ngagai status Oren pengudah ngerikodka sepenyampau 23 kes berampit ba pelilih menua tu dalam timpuh 14 hari ke udah.
Nya ngujungka penyampau pelilih menua status Oren bisi 15 buah, sereta 11 pelilih menua agi ba status Mirah, 16 pelilih menua ba status Kuning enggau lapan (8) pelilih menua agi ba status Gadung.