Pengemeran media patut dituchuk vaksin dulu: Kelvin
KUCHING: Taja pan pengemeran media enda dipasuk dalam Fasa 1 Program Imunisasyen COVID-19 Menua ari baruh garis lalau perintah besai, Komiti Mutarka Penusah Ngenyit Nengeri Sarawak (JPBNS) diansak ngambika jampat agi ngemasukka raban tu laban beratika penambah kes di Sarawak, pia ku Kaban Parlimen Bandar Kuching Dr Kelvin Yii.
JPBNS ku iya, patut ngemaru pemujur Fasa 1 program nya di Sarawak ti nyengkaum raban pengereja pengawa opis pengerai terabai menua enggau ke ukai pengereja pengawa opis pengerai ti udah nerima vaksin laban Fasa 2 diripotka deka berengkah pun minggu tu.
“Tu nyengkaum ngemaru pengawa meri vaksin ngagai media enggau pengarang berita di Sarawak. Keterubah suba, JPBNS madahka sida tu patut dipasukka dalam Fasa 1 program nya, tang naka ke diatu semina 13 iku aja pengereja pengawa media udah divaksin.
“Asa amat ati laban pengemeran media ke bukai enda dikemeratka taja pan kitai nemu sida betapi enggau risiko.
“Sida mega berisiko nyadung penyakit nya laban raban tu raban ti aktif dalam komuniti,” ku Dr Yii nengah penerang iya ensanus.
Berebak enggau nya, Dr Yii ngansak JPBNS ngulu taja pan enda sebaka enggau garis lalau perintah besai kelebih agi lebuh sida madahka bisi autonomi enggau autoriti, laban beratika penambah kes di Sarawak nyengkaum orang ti mai asimtomatik ti mayuh.
“Sida patut beratka pengarang berita laban raban tu b isi tanggungpengawa ke berat ti dipejalaika, sekalika enggau sechara fizikal ba mensia mayuh.
“Perintah nengeri mega patut berunding ngurangka aktiviti enggau mensia mayuh nyengkaum aum media fizikal nyentuk ke semua ke bekaul nya dijaga enggau manah, lalu penyampau kes di nengeri tu diputarka enggau manah,” ku iya.
Tambah Dr Yii, nitihka gaya pengawa pengemeran media, raban tu ngembuan dua batang kriteria iya nya tau nyadung virus sereta tau dirampit penyakit nya.
Nya alai, pengawa nuchuk vaksin ngagai raban media, patut amat kelebih agi ngagai sida ti bejalaika pengawa di luar opis, ku iya nyemetak.
“Laban kitai nyau semak enggau Fasa 2 lalu perintah mega kala nyebut deka ngemaratka raban pengereja pengawa terabai menua sekeda sektor ekonomi, aku ngansak ngambika raban media mega dikemeratka dalam Fasa 2 Program Imunisasyen COVID-19 Menua.
“Kebuah pia, laban raban tu berisiko tinggi dirampit sereta nyadung SARSCoV-2 laban sida aktif dalam komuniti, kelimpah berundingka pemesai reti kereja sida ba pengawa ngerembaika pemadah, kelebih agi kena ngatur sereta ngemujurka krisis pe4ngerai mensia mayuh,” ku iya.