Bisi tiga iti agi kluster baru COVID-19 di Sarawak
KUCHING: Opis Pengerai Nengeri Sarawak kemari netapka bisi tiga iti agi kluster baru COVID-19 di nengeri tu, iya nya ba Pelilih Menua Miri, Sibu enggau Sarikei.
Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka, dua ari tiga kluster nya kluster ba endur kereja lalu siti nya kluster komuniti.
Tiga kluster baru COVID19 kemari iya nya Kluster Jalai Kingsway, Miri; Kluster Bulatan Aman, Sibu enggau Kluster Jalai Baji, Sarikei.
"Kluster Jalai Kingsway, Miri iya nya kluster ba endur kereja ti ditemu bekaul enggau sebuah premis perintah ba Jalai Kingsway, Miri.
"Kluster Bulatan Aman, Sibu mega kluster ba endur kereja ti ditemu bekaul enggau sebuah kilang ba Jalai Upper Lanang, Bandar Sibu ti semak enggau roundabout Jalai Aman ba Pelilih Menua Sibu.
"Kluster Jalan Baji, Sarikei iya nya kluster komuniti ti ditemu bekaul enggau sebuah genturung pendiau ba Jalai Baji, Sarikei," ku JPBNS, kemari.
Nerangka silik bekaul enggau Kluster Jalai Kingsway, JPBNS madah, indeks kes kluster tu iya nya kes ke13,157 siku lelaki peranak menua (Sarawak) beumur 54 taun ti ditemu nengah pengawa meresa individu bisi tanda ba Sepital Miri kena 17 Mac 2021.
Asil ari pengawa nyidi kes ngena chara aktif enggau meresa semua kontak semak, diri sebilik enggau kontak kasual kes indeks bisi 384 individu udah diperesa.
"Kes (ke-13,157) tu gawa nyadi raban penerit adat ba premis nya berengkah bisi tanda kena 12 Mac 2021. Asil pansik ke dipejalaika indeks kes ditemu engka dirampit ari komuniti ba Pelilih Menua Miri.
"Ari semua 384 individu ke udah diperesa, bisi 51 kes udah ditetapka positif COVID-19 nyengkaum kes indeks, 173 individu negatif ba beperesa keterubah enggau 160 individu agi nganti pemutus.
"Semua 51 kes positif dalam kluster tu udah dibai ke Sepital Miri ngambika diperubat sereta diserara ba Sepital Miri tauka PKRC Miri. Sereta kontak semak ngagai kes-kes positif udah dipasukka ba palan kuarantin ngambika diserara sereta diperesa COVID-19," ku JPBNS.
Bekaul enggau Kluster Bulatan Aman, Sibu, indeks kes iya nya kes ke-14,193 siku lelaki peranak menua (Sarawak) beumur 52 taun ti ditemu nengah pengawa meresa individu bisi tanda ba Klinik Pengerai Lanang kena 19 Mac 2021.
Asil ari pansik silik ke dipejalaika, COVID-19 bisi ngelekai ba sebuah rumah panjai indeks kes ba Nanga Assan, Sibu.
Bisi 89 individu udah diperesa ti nyengkaum diri sebilik enggau bakih sama endur kereja indeks kes ari nya 18 iku kontak semak enggau 24 iku kontak bakih sama endur kereja ditemu positif COVID-19.
"Indeks kes ti gawa nyadi deriba lori ari baruh rentayan operasyen kilang nya berengkah bisi tanda kena 18 Mac 2021. Asil pansik silik tetemuka indeks kes tu dipelaba udah dirampit ari komuniti ba Pelilih Menua Sibu.
"Ari semua 89 individu ke udah diperesa , bisi 43 kes udah ditetapka positif COVID-19 nyengkaum kes indeks, 23 individu negatif enggau 23 individu agi nganti pemutus.
"Semua 43 kes positif COVID-19 dalam kluster tu udah dibai ke Sepital Sibu sereta udah dipasukka ba PKRC Sibu ngambika diperubat sereta diserara," ku JPBNS.
Kelimpah ari nya, Kluster jalan Baji, Sarikei ku JPBNS, indeks kes iya nya kes ke15,394 siku lelaki peranak menua (Sarawak) beumur 16 taun ti ditemu nengah pengawa meresa individu bisi tana da ba Klinik Pengerai Sarikei.
Kes ditemu reaktif ujian RTK Antigen kena 25 Mac 2021 sereta dipasukka ba PKRC Sarikei ngambika diperubat sereta diserara enggau ditetapka positif COVID-19 nengah peresa rT-PCR kena 28 Mac 2021.
"Kes ke apin kereja dipelabaka dirampit ari komuniti ba ngelingi Pasar Sarikei.
"Asil ari pengawa nyidi kes ngena chara aktif enggau meresa semua kontak semak, diri sebilik enggau kontak kasual indeks kes, bisi 29 iku udah diperesa lalu ari penyampau nya bisi 20 kes ditetapka positif COVID-19 nyengkaum kes indkes, lima (individu negatif enggau empat individu agi nganti pemutus.
"Semua 20 kes postitif COVID-19 dalam kluster tu udah dibai ke Sepital Sarikei sereta dipasukka ba PKRC Sarikei ngambika diperubat sereta diseraraka," ku JPBNS.
Enggau penambah tiga kluster baru nya, naka kemari bisi 36 kluster COVID-19 ti agi aktif di Sarawak.