Peranak di menua pesisir patut sama ngasika SOP
Kena nagang pengelekai pandemik COVID-19, ketegal agi mayuh kes positif di menua pesisir: Uggah
e“Kitai udah meda nama utai ke nyadi pengudah pengawa rabat, nikah, nyabung, ngintu hari pengada enggau pengerami rama ke bukai, kes positif diripotka deka nambah sereta nya ngirauka. ” Datuk Amar Douglas Uggah Embas
SPAOH: Raban bansa ba menua pesisir patut terus sama ngingatka pangan diri pasal pemesai guna nitihka semua prosedur operasyen standard (SOP) kena ngelaban pandemik COVID-19.
Sapit Kepala Menteri, Datuk Amar Douglas Uggah Embas madahka, laban COVID-19 agi nyadi sereta diatu mayuh agi kes positif ari menua pesisir.
Iya ti mega Chairman Komiti Mutarka Penusah Ngenyit Nengeri Sarawak madah bepelasarka pekara ti udah diperati kes majak nambah pengudah pengerami rama ba rumah panjai enggau genturung pendiau.
“Kitai udah meda nama utai ke nyadi pengudah pengawa rabat, nikah, nyabung, ngintu hari pengada enggau pengerami rama ke bukai, kes positif diripotka deka nambah sereta nya ngirauka.
“Tu laban COVID-19 ulih ngerembai tauka ngelekai jampat maya ba endur ti
Sapit Kepala Menteri
sekut. Siku orang ti enda nemu diri dirampit ulih ngerembai tauka ngerampitka nya ngagai orang bukai.
“Kitai patut terus bejaga enggau sama ngingatka pangan diri seruran nitihka SOP. Kitai semina ulih selamat enti semua orang selamat,” ku iya ngelalau maya nyuaka geran ari perintah nengeri sepenyampau RM500,000 ngagai Masjid Darul Syifa ti diterima komiti Wan Setia Wan Akil.
Dulu ari nya Uggah ngabas program meri vaksin ngagai raban terabai menua ba bagi menua nya ti diatur ba Dewan Panglima Rentap di Betong.
Nyempulang iya, Kaban Kunsil Nengerin (ADUN) Saribas Mohd Razi Sitam enggau ADUN Beting Maro Razaili Gapor.
Bejaku ngagai pengarang berita, iya madah urung 2,422 terabai menua ba menua nya udah dituchuk vaksin dos keterubah sereta semua dipelaba deka nerima vaksin penuh ba ujung bulan tu.
Kelimpah ari nya bekaul enggau program meri vaksin ba serata nengeri tu, iya mdahka semua bejalai enggau lanchar ti nyengkaum palan, lutur enggau pekereja pengerai.
“Kitai semina nganti bekal tauka stok vaksin.
“Nyentuk diatu, urung 1.23 juta rayat Sarawak ke patut enggau besetuju udah ngerejista ngena aplikasyen MySejahtera enggau ngena chara manual.
“Kitai ngarapka sektor peribit deka nganjung lis nama pekereja sida pemadu laun kena 12 April tu.” ku iya.
Berebak enggau tu Uggah ngingatka mensia mayuh ngambika enda tekeruga runding enggau sekeda berita bula ti dikerembaika ba mensia rama ti lalu ngujungka enggai nerima tuchuk vaksin.
Vaksin, ku iya, udah ngaynka ulih nyaga orang ari COVID-19.
Ngenang pekara bukai, iya madahka Sarawak nganti pemutus ari Majlis Keselamatan Negara nyema orang ke udah nerima dos penuh sekalika dikemendarka tauka enda pansut tauka bejalai ke luar menua tauka luar nengeri.
Iya melabaka Majlis nya (MKN) deka baumka pasal pekara nya.
Kemari mega, Uggah disempulang Sekretari Politik ngagai Kepala Menteri Dr Richard Rapu enggau Pemedai Pelilih Menua Betong Sofhi Jebal ke Spaoh ngabs pemansang projek Kompleks Lumba enggau Main Spaoh ti beungkus urung RM11 juta sereta dipelabaka tembu magang ba bulan Jun ke deka datai.