COVID-19: 290 kes baru, siti kes pemati dirikodka di Sarawak
KUCHING: Bisi 290 kes baru COVID-19 enggau siti (1) kes pemati baru ketegal COVID-19 diripotka ba nengeri tu kemari.
Sekretariat Komiti Mutarka Penusah Ngenyit Nengeri Sarawak (JPBNS) madahka, nya nyadika penyampau semua kes positif COVID-19 nambah nyadi 17,135 kes enggau 113 iku kes pemati.
“Sehari tu bisi 290 kes baru COVID-19 ditemu ba Sarawak. Pelilih Menua ti ngeripotka kes iya nya Kuching (86), Bintulu (81), Miri (36), Sibu (22), Serian (20), Samarahan (7), Kapit (6), Subis (6), Julau (5), Bukit Mabong (4), Meradong (3), Marudi (3), Sarikei (2), Selangau (2), Sri Aman (2), Tebedu (2), Tanjung Manis (1), Tatau (1) enggau Belaga (1).
“Ari semua 290 kes baru ti diripotka nya, bisi 156 kes asil meresa individu bisi kontak ngagai kes positif COVID-19 (18 iku bisi tanda); 104 kes asil meresa individu dalam kluster aktif ke udah bisi (24 iku bisi tanda); 20 kes asil meresa individu bisi tanda ba fasiliti perintah; lapan kes bukai beperesa ba fasiliti perintah (siku bisi tanda); siti kes bekaul enggau individu pulai ari Papua New Guinei (kes Import A) enggau siti kes bekaul enggau individu pulai ari nengeri bukai dalam Malaysia (kes Import B),” ku JPBNS, kemari.
Bekaul enggau siti kes pemati baru ketegal rampit COVID-19, JPBNS madahka, kes pemati ti ke-113 iya nya kes ke-16,593.
“Kes (ke-113) bekaul enggau siku lelaki peranak menua (Sarawak) beumur 50 taun ti ditemu sida sebilik enda ngeleda dirumah. Kes lalu terus sida sebilik ngagai Jabatan Kesemasan Sepital Bintulu.
“Kes ditetapka udah nadai kena 29 Mac 2021. Ujian rTPCR udah diambi kena 30 Mac 2021 sereta ditemu positif COVID-19 kena 2 April 2021. Kes nadai ko-morbid,” ku JPBNS ti meri penyinu ati ngagai semua sida ke sebilik enggau kes pemati.
JPBNS kemari mega ngeripotk bisi 226 kes baru udah gerai sereta dikemendarka pansut ari Sepital Miri (48), Sepital Bintulu (48), Sepital Sibu (39), PKRC Serian (32), Sepital Besai Sarawak (25), Sepital Sarikei (21), PKRC Sepital Kapit (12) enggau PKRC Mukah (1).
Nya ngujungka penyampau semua kes positif COVID-19 ti udah gerai sereta dikemendarka pansut ari sepital nambah nyadi 14,244 iku tauka 83.13 peratus ari penyampau semua kes COVID-19 ba Sarawak, ku JPBNS.
Lalu kemari bisi 290 PUI baru udah diripotka enggau siti ti agi nganti pemutus makmal.
Kelimpah ari nya, bekaul enggau status COVID-19 ba pelilih menua di nengeri tu, Pelilih Menua Belaga enggau Pelilih Menua Bukit Mabong betukar nyadi status Kuning.
“Sehari tu, Pelilih Menua Belaga udah betukar ngagai status Kuning ari status Gadung pengudah ngerikotka siti kes berampit ba pelilih menua tu dalam timpuh 14 hari ke udah.
“Pelilih Menua Mabong udah betukar ari status Oren ngagai status Kuning pengudah ngerikodka semina 20 kes brampit ba pelilih menua tu sehari tu,” ku JPBNS.
Nya alai naka kemari penyampau semua pelilih menua ba status Kuning nambah ngagai 19 pelilih menua sereta penyampau pelilih menua ba status Oren nurun nyadi tiga pelilih menua.
Lalu 10 pelilih menua agi ba status Mirah enggau lapan pelilih menua agi ba status Gadung.