JKNS ngenukuka Kluster Kampung Binyu siti kluster baru di Sarawak

KUCHING: Opis Pengerai Nengeri Sarawak (JKNS) netapka Kluster Kampung Binyu, Kuching siti kluster baru ba Sarawak.

Sekretariat Komiti Mutarka Penusah Ngenyit Nengeri Sarawak (JPBNS) nengah penerang berita madahka, Kluster Kampung Binyu, Kuching iya nya kluster komuniti.

Asil ari pansik silik nemu kes tu bisi sejarah ngulu pengerami nikah ba Kampung Binyu, Kuching.

“Kluster Kampung Binyu iya nya kluster komuniti ti ditemu bekaul enggau pengerami nikah ba Kampung Binyu, Jalan Tanjung Bako ba Pelilih Menua Kuching.

“Kluster tu ditemu lebuh beberapa individu bisi tanda (kes ke-16,214; 16,194 enggau 16,196) ti udah beperesa COVID-19 ba fasiliti pengerai di pelilih menua Kuching enggau Bintulu ditemu positif kena 30 Mac 2021,” ku JPBNS, kemari.

Nitihku JPBSN, asil ari pengawa nyidi ngena chara aktif enggau meresa semua kontak semak, diri sebilik enggau kontak kasual kes bisi 231 individu udah diperesa.

Ari penyampau semua 231 individu udah diperesa, bisi 68 kes ditemu positif COVID-19 nyengkaum kes indeks; 163 kes ditemu negatif ba beperesa keterubah enggau nadai kes nganti pemutus makmal.

Semua 68 kes positif COVID-19 dalam kluster tu udah dibai sereta diseraraka ba Sepital Besai Sarawak tauka ba PKRC Kuching enggau Sepital Bintulu, ku JPBNS.

Kontak semak ngagai keskes positif tu mega udah dipasukka ba palan kuarantin ngambika diserara sereta diperesa COVID-19.

“(Enggau penambah siti kluster baru) Sehari tu bisi 37 kluster ti agi aktif. Ari penyampau nya bisi 14 kluster ti ngeripotka nambah kes enggau 23 kluster nadai nambah kes.