Tikas ngasika SOP di Miri ngemuaska ati
MIRI: Komiti Mutarka Penusah Ngenyit Bagi Menua (JPBB) Miri mantaika pengandal ati enggau tikas pengasi prosedur operasyen standard (SOP) peranak di mengeri besai tu, sekalika ba raban pedagang tauka penguna.
Menteri Perengka pengangkut Sarawak Datuk Lee Kim Shin ti mega menteri ke megai tanggungpengawa ba JPBB Miri, minta komuniti ditu terus ngasika SOP dalam mutuska rentayan igi penyakit COVID-19.
Ku iya madah, semina nengah pengawa komuniti ti terus ngasika SOP ulih mutuska rentayan pengelekai igi penyakit ti ulih nabanka nyawa tu lalu pia mega ulih ngurangka kes COVID-19 ditu.
“Nengah pengawa matau ti diatur (kilah ensanus), kitai udah meda aspek ngasika SOP iya nya ba tikas ti ngemuaska ati.
“Beserimbai enggau nya, aku minta ngambika peranak Miri terus bekerejasama mnutuska rentayan pandemik COVID-19 lalu terus ngasika SOP baka ‘scan’ kod QR nengah aplikasyen MySejahtera, ngemeranka seraka fizikal, ngena sengkabung idung enggau mulut, meresa tikas pengangat tubuh sereta ngena ‘sanitizer’ jari,” ku iya.
Dulu ari nya, Lee enggau raban JPBB Miri udah matau kediri empu tikas pengasi SOP COVID-19 ba Pasar Pujut Covrner enggau Terminal Bas Miri ditu, kemari.
Iya mega minta raban pedagang enggau pengempu kedai ngerejista diri nerima tuchuk vaksin COVID19 ungkup pemaik sereta pengerai sida empu.
Sama enggau dalam pengawa matau tu iya nya Datuk Bandar Adam Yii, pengari Opis Residen Bagi Menua Miri Rose Edward Tarang, Pemangku Pemesai Opis Pelilih Menua Miri Siti Rohanie Yusof, Sekretari Opis Kaunsil Mengeri Miri (MBM) Morshidi Frederick sereta pengari opis ti bekaul.