Projek Ngangkatmanah Sistem Parit deka mutarka penanggul ampuh bah tunggal di Taman Gamang
SRI AMAN: Peranak di Taman Gamang, Sri Aman deka diberi pemansang enggau Projek Ngangkatmanah Sistem Parit ti dipejalaika ari Opis Ai enggau Entali Ai Bagi Menua Sri Aman ditu.
Menteri Muda Pengelantang Komuniti Sarawak Datuk Francis Harden Hollis madahka projek ngangkatmanah sistem parit nya udah diberi kunterik ngagai DNAJ Enterprise enggau ungkus pemadu tinggi iya nya sepenyampau RM300,000 nengah agih belanja Program Pemansang Menua Pesisir (RTP) Kaban Kunsil Nengeri (ADUN) Simanggang lalu timpuh nya dipelaba tembu kena 14 April tu.
Nitih ku iya, projek ngangkatmanah sistem parit tu endang patut laban kandang menua nya suah napi penusah ampuh bah tunggal laban parit ti sebat lalu ditambahka enggau nadai jalai pemansut ti manah kena ngurangka tikas ai nya,” ku iya.
Harden madah munyi nya lebuh ti ditemu pengudah matau projek nya ditu, kemari.
Beserimbai enggau nya, Harden mega sama ngelalau kunteriktor kelebih agi ti megai tanggungpengawa dalam bejalaika projek nembuka pengawa nya dalam timpuh ti ditetapka dalam surat bulih tinda kunterik.
“Enti ulih ngagai kunteriktor besai anang ngirit penanggul gawa ngagai pemuntan enda tejapaika juluk ti ngaul raban ke bejalaika pengawa.
“Kebuah pia, laban nyadi kunteriktor kitai patut besedia enggau pelin mulaika pemanah sereta pelin ti enda disadang nyema bisi penanggul dalam bejalaika projek,” ku iya nyemetak.
Ku iya nambah, kunteriktor patut mansik skop kereja ti udah dipesetuju nya dulu ngambika enda ngenataika empas ti negatif ti ngujungka peranak sebana laban tekeruga ketegal kereja ti dipejalaika nya enda likun lalu enda ngerundingka pengelantang peranak.
Sama bisi lebuh program matau tu iya nya Azizi bin Dahlan enggau Khairul Hakimi Suhaili ti ngarika ejensi ti bejalaika pengawa iya nya Opis Parit enggau Entali Ai Bagi Menua Sri Aman sereta Chairman Komiti Pemansang enggau Pengelikun Genturung Pendiau (JKKK) Taman Gamang, Sri Aman Nicholas Nyalung.