UPMKB chakah bejalaika inisiatif nyadi ‘Universiti Gadung’

BINTULU: Kena nentuka meruan enggau gelar ‘Universiti Gadung’ tauka ‘Kampus Gadung’ di Universiti Putra Malaysia Kampus Bintulu (UPMKB) iya nya siti inisiaitif kena nerenakka pemereti ati bekaul pemerat rampa menua ti mesti dijaga semua. Nengah inisiatif tu, mayuh program udah diatur dikena mekuh ngagai rampa menua chakah dipejalaika Kolej Sri Rajang, UPMKB.

Inisiatif ti mungkur semua baka ngatur program Greenery Day mega chakah dipejalai nitihka timpuh ke ditetapka kena nerenak sereta ngemeranka bala nembiak ngambika sama begulai nyabidang pai juluk UPMKB.

Seriris enggau ngintu Pengerami Jubli Emas beserimbai enggau 50 taun UPM ditumbuhka ti berambai jaku ‘Pertanian, Inovasi, Kehidupan’, program bansa tu endang sejalai enggau tuju UPM ti nyadi universiti ke mekuh ngagai bidang betanam betupi lalu ulih meri sukung dalam aspek ti bekaul.

Ngena penemu dalam betanam betupi ke endang dipelajar dalam kelas, bala nembiak diberi peluang ngelangkar mayuh macham aktiviti ti engkeman nyengkaum aktiviti nanam mayuh macham spesies pun kayu, ngumpul barang ti dibuai ke ulih dikena baru nengah program baka ‘Zero Waste’ ti udah setipak enggau UPMKB kenyau ari mula nya dimunka kena 29 Jun 2019 lalu udah dipenyadi Direktor Kampus maya nya Prof Dr Bujang Kim Huat.

Kelimpah ari aktiviti nanam pun kayu, pengawa ngemanahka rampa menua mega terus dipejalai kena nentuka semua raban kampus ngembuan runding ti komited sereta bekrejasama dalam nyapai juluk ti pulaika pemanah enggau pengelantang raban UPMKB.

Semua inisiaitif ti dilangkar sekalika terus tauka enda tu endang disambut manah raban nembiak ti belajar di UPMKB lalu tu diayanka enggau sukung sida mai kontena kediri lebuh ti bebelika pemakai.

Berindik ari nya, program bansa tu patut terus dikemeran lalu mesti nyadi rutin semua raban ngambika ulih terus nentuka pemanah rampa menua ungkup pemaik enggau pengelantang semua.

BERIPAI: Ulah ti ulih bekerejasama enggau pangan diri ti nyadi entara juluk ngatur program Greenery Day kena ngemanahka rampa menua di Kolej Sri Rajang.

KE PEMANAH RAMPA MENUA: Aktiviti nanam pun kayu ba semanjai jalai entara blok endur diau nembiak lelaki di UPMKB.

AKTIVITI MANAH: Pengawa mindahka paung pun kayu ke pasu lalu ngena penemu ti endang dikemeranka dalam kelas.

NADAI URAS: Pengawa ngambi ruas ungkup aktiviti ngena baru barang ti dibuai seriris enggau program Zero Waste.

SUKUNG: Penyereta bala nembiak UPMKB ba program Greenery Day ti diatur ba Kolej Sri Rajang.

MANAH: Pengawa nutuh pun kayu ba kandang endur Kolej Sri Rajang dalam nentuka utai tanam nya manah dipeda.

NANAM BARU: Nusun batu bata kena nanam baru pun kayu ti nyadi ikon nama Kolej Sri Rajang.

MANAH DIPEDA: Pengawa nyaga tauka ngintu utai tanam di Kolej Sri Rajang kena ngemeranka runding sayauka rampa menua sereta pengeraja asal.