Uggah: Perintah nengeri udah ngungkupka RM464.9 juta ungkup pemansang di Spaoh
KUCHING: Projek pemansang ti udah dikemendarka perintah nengeri ba Pelilih Menua Mit Spaoh sepenyampau urung RM464.9 juta udah tembu sereta benung chakah digaga, ti dikerap ulih ngangkatka pengelantang peranak menua pesisir ba kandang menua nya.
Sapit Kepala Menteri, Datuk Amar Douglas Uggah Embas madahka mayuh pemansang bukai deka chakah dipejalaika ulih perintah Gabungan Parti Sarawak ti diiring Kepala Menteri Datuk Patinggi Abang Johari ba menua pesisir kelimpah ba mengeri.
Baka ba Sitak Kunsil Nengeri (DUN) Bukit Saban ti mungkur Pelilih Menua Mit Spaoh mayuh projek udah diperambu, dikemendar sereta dikeamatka perintah.
“Sehari tu tuju kitai ngatur tu, awakka rayat nemu nama pekara (projek pemansang) ti disemaya YAB Datuk Patinggi ulih dikeamatka, ukai semaya bula.
“Iya (YAB Datuk Patinggi Abang Johari) enda nipu rayat tang iya terus ngemansangka rayat. YAB ngemeratka rayat, selalu berundingka bakani mai ubah (ti mai pengelantang) ke rayat.
“Ngarapka lebuh datai ba maya iya ila ba (DUN) Bkit Saban tu enggau serata menua Sarawak, GPS deka terus merintah nengeri Sarawak, laban kitai bisi bukti ti chukup ti ngayanka gaya iring pemesai kitai enggau GPS ngemansangka Sarawak sekalika di menua pesisir tauka ba mengeri,” ku iya.
Uggah ti nyadi Kaban Kunsil Nengeri (ADUN) BUkit Saban mansutka pekara nya dalam jaku pengelalu Program Lawatan Kerja ‘Janji
Diteoati’ Ketua Menteri Datuk Patinggi Abang Johari Tun Openg ti diatur ba Dewan masyarakat Spaoh di Betong, kemari.
Entara projek ti deka dikemansangka ba Pelilih Menua Mit Spaoh nyengkaum Jematan Sungai Paku, Lapangan Terbang Landasan Pendek (STOLport) Bebuling, Food Terminal enggau ke bukai.
“Pengudah mendingka licha bisi atur pengawa nyuaka Surat Tawaran kereja ngaga jematan sungai paku ti beungkus RM26 juta. YAB Datuk Patinggi madah orang Spaoh patut bulih jematan ti lebih manah enggau ikonik, berindik ari nya iya ngemendarka RM30 juta, tang tinda nya RM26 juta.
“Nambah nya program kitai mega nyuaka Surat Tawaran ngaga Padang Bilun Bebuling ti beungkus RM108 juta lebih.
“Tuju iya ngemendarka padang bilun tu ngambika asil betanam betupi ari ari projek Agropolitan Bukit Sadok enggau projek ‘Food Basket’ ulih dijual ke luar menua, tu tuju besai kitai,” ku iya ti mega Menteri Betanam Betupi Moden, Tanah Adat enggau Pemansang Kandang Menua.
Bejaku baru iya madahka enggau penembu padang bilun baru ba Bebuling nya ila mega dipelaba ulih matak temuai nemuai ngagai menua nya sereta terus ke Batang Ai.
Iya mega madahka perintah nengeri mega udah ngemendarka ‘Food Terminal’ iya nya sebengkah palan ngumpul, mungkus enggau nyual (CPPC) ti nitihka standard pemakai di luar menua.
“YAB (Datuk Patinggi) meda pasar ditu enda mayuh, iya udah ngemendarka 12 buah pasar,” ku iya kelimpah ari ti udah ngemendarka dua buah Agropark iya nya ba Debak enggau Bebuling ti nanam sayur enggau buah ngena teknologi baru.
Kelimpah ari Abang Johari, sama bisi datai ba program nya Menteri Dagang Temuai, Seni enggau Main Asal Datuk Abdul Karim Rahman Hamzah, Kaban Parlimen Betong Datuk Robert Lawson Chuat, ADUN Layar Gerald Rentap Jabu; enggau sida ke bukai.