Kes baru positif COVID-19 di Sarawak nurun ngagai 296 kes kemari: JPBNS
KUCHING: Kes kena rampit ninting hari baru COVID-19 di Sarawak nurun ngagai 296 kes kemari enti dibandingka enggau 555 kes kemari enggau empat agi kes pemati dirikodka di Sarawak.
Komiti Mutarka Penusah Ngenyit Nengeri Sarawak (JPBNS) nengah penerang media madahka Bintulu ngerikodka kes ninting hari ti pemadu tinggi kemari iya nya bisi 101 kes lalu ditangkanka Kuching (41), Miri (35) sereta Sibu (32).
Rikod kes ke bukai iya nya bisi di Matu (26), Subis (9), Serian (8), Kanowit (7), Sarikei (7), Samarahan (7), Julau (6), Meradong (5), Marudi (3), Tebedu (2), Bau (2) lalu bela siti kes di Beluru, Saratok enggau Sebauh.
Tu nyadika penyampau semua kes kena rampit COVID-19 di Sarawak nambah ngagai 19,558 kes lalu kes pemati nambah ngagai 124 kes.
“Ari 296 kes baru ti diripotka, 190 kes tu iya nya ari pengawa meresa individu ti bisi kontak semak ngagai kes positif COVID-19.
“Ke alai 49 kes bukai iya nya pengawa meresa ba fasiliti pengerai, 31 kes iya nya pengawa meresa individu ti bisi simptom di fasiliti pengerai sereta 26 kes iya nya individu dalam kluster aktif ti benung aktif,” ku iya.
Bekaul empat kes pemati, kes ke-121 tu ngaul lelaki peranak menua tu ti beumur 48 taun ti udah dianjung ke Sepital Kapit.
Peresa rT-PCR digaga lalu iya ditemu positif kena 5 April sereta kes ke sama mega bisi ko-morbid penyakit darah tinggi, gout, dislipidemia enggau strok ti disahka midang ba hari ti sama.
“Kes pemati ke-122 tu ngaul siku indu ti udah lunggar umur ke beumur 83 taun ti udah dipasuk ke Sepital Sibu.
“Pesakit tu bisi simptom batuk enggau tusah deka enseput sereta ditemu positif COVID-19 nengah pengawa meresa ke udah digaga kena 30 Mac 2021.
“Gaya pengerai kes dipeda majak kurang lalu disahka midang kena 9 April 2021,” ku iya ti nambah kes mega bisi komorbis penyakit darah tinggi, gout, dislipidemia sereta riman tusu.
Dua agi kes pemati iya nya kes ke-123 enggau kes ke-124 iya nya indu ti beumur 72 taun ti udah dipasuk ke Sepital Sibu.
Kededua kes tu disahka midang kena 9 April 2021 lalu sama bisi ko-morbid penyakit bukai enggau kes ke-124 iya nya ari Kluster Rejang.
JPBNS mega madahka 381 kes ti udah gerai lalu dikemendar pansut ari sepital enggau penyampau kes semua nya ti udah gerai lalu dikemendar pansut ari sepital nambah ngagai 15,911 iku tauka 81.35 peratus.
Penyampau kes aktif ti agi diperubat lalu diengkah ba wad isolasyen di PKRC enggau wad sepital iya nya bisi 3,463 iku.
Pia mega bisi 336 kes orang ti dipelaba (PUI) baru diripotka enggau enam PUI agi nganti pemutus peresa makmal.