Kluster Pujut Satu, Jalai Bambangan dua kluster baru di Sarawak kemari

KUCHING: Dua agi kluster baru kena rampit COVID-19 udah ditukuka di Sarawak kemari iya nya Kluster Pujut Satu di Miri enggau Kluster Jalai Bambangan di Mukah.

Mkomiti Mutarka Penusah Ngenyit Nengeri Sarawak (JPBNS) nengah penerang media kemari madahka Kluster Pujut Satu ti ngerikodka siti kes baru COVID-19 kemari lalu nyadika semua kes kena rampit ti ngaul kluster tu nambah ngagai 24 kes naka ke diatu.

Bisi 116 kes individu ti kena peresa ari baruh kluster tu ke alai 90 iku ditemu negatif lalu dua agi nganti pemutus makmal.

“Kluster Jalai Bambangan mega ngerikodka siti kes baru COVID-19 sehari tu (kemari) lalu tu nambah ngagai 14 kes naka ke diatu.

“Bisi 72 iku udah diperesa ke alai 14 kes udah ditemu positif lalu 58 kes individu agi nganti pemutus peresa makmal,” ku iya.

Enggau penambah dua kluster baru tu, bisi 47 kluster ti benung aktif di Sarawak.

Ari penyampau nya, bisi 13 kluster ngeripotka kes ti nambah lalu 34 kluster agi nadai nambah kes.

JPBNS mega madahka Pelilih Menua Matu udah betukar status ari Kuning ngagai Mirah pengudah ngerikodka 42 kes kena rampit dalam menua dalam timpuh 14 hari ti udah.

Tu nyadika semua pelilih menua ti ba status Mirah nambah ngagai 14 pelilih menua nyengkaum Mukah, Sri Aman, Sarikei, Beluru, Samarahan, Serian, Julau, Meradong, Kuching, Kapit, Bintulu, Miri enggau Sibu.

Lalu pelilih menua ti ba status Kuning kurang ngagai 16 pelilih menua iya nya

Dalat, Daro, Asajaya, Lawas, Bukit Mabong, Belaga, Betong, Lubok Antu, Tatau, Tanjung Manis, Song, Pakan, Tebedu, Bau, Selangau enggau Limbang.

Lima pelilih menua iya nya Subis, Saratok, Sebauh, Marudi enggau Kanowit agi ba status Oren lalu lima pelilih menua bukai iya nya Telang Usan, Lundu, Pusa, Simunjan enggau Kabong mengkang ba status Gadung.