Pengulih ngena nama ‘Wilayah’ Sarawak bepanggai ba asil runding MA63
KUCHING: Pengulih Sarawak ngena nama tauka istilah ‘Wilayah’ bepanggai ba asil runding Sempekat Malaysia 1963 (MA63) ti benung dipejalaika diatu.
Kepala Menteri, Datuk Patinggi Abang Johari Tun Openg madahka, perambu bekaul enggau Sarawak ngena nama ‘Wilayah’ disebut Menteri Besai Tan Sri Muhyiddin Yassin maya nemuai ke Sarawak apin lama, sereta Sarawak nerima perambu nya.
“Taja pia, sekalika kitai ngena nama nya (Wilayah) tauka enda, kitai bepanggai ba asil runding kitai diatu, pekara ti dirunding kitai diatu pasal MA63. Nya perambu ari Menteri Besai (PM), orang deka nyebut nuan ngena nama ‘Wilayah’ nuan nerima aja. Tang kitai nyerah tauka bepanggai ngagai pakar undang-undang nentuka bagi nama tauka istilah ke amat. Kitai agi berandau tauka berundingka tu ari baruh MA63,” ku iya.
Abang Johari madahka pekara nya lebuh ditanya ba aum pengarang berita Pengerami Nasih Tanah Stadium Mini Balai Ringin, ba Balai Ringin, Serian kemari.
Dulu ari nya iya madahka Sarawak minta Perkara 160 (2) Konstitusyen Perintah Besai ti bekaul enggau gelar ‘persekutuan’ patut diubah ngambika Sarawak sereta Sabah ulih nitihka penetap dalam MA63.
Ku iya dalam penetap ke diatu nitihka ngagai ‘Persekutuan Tanah Melayu’ aja iya nya ‘Perjanjian Persekutuan Tanah Melayu’.
Tang dalam MA63, pengawa numbuhka Malaysia iya nya nyengkaum tiga Wilayah iya nya lumur satu, Persekutuan Tanah Melayu, lumur dua Sabah enggau Sarawak sereta Singapura (udah pansut).
“Nyadi kitai nengeri Sarawak minta ngambika konstitusyen tu (Konstitusyen Perintah Besai) diubah iya nya patut nitihka Sempekat Malaysia (MA63).
“Ari tu baru ulih nukar Perkara 1(2) dalam Konstitusyen (Perintah Besai) iya nya Malaysia nyengkaum lumur satu,Persekutuan Tanah Melayu sereta lumur dua, Sabah enggau Sarawak,” ku iya.
Sama bisi ba aum pengarang berita nya, Sapit Kepala Menteri Tan Sri Datuk Amar James Jemut Masing, Menteri Nembiak enggau Lumba enggau Main Datuk Abdul Karim Rahman Hamzah, Menteri Muda Nembiak enggau Lumba enggau Main ti mega Kaban Kunsil Nengeri (ADUN) Balai RIngin Datuk Snowdan Lawan enggau sida ke bukai.