Jaya: Mayuh agi chara patut dilangkar kena ngurangka pengelekai COVID-19 di Sarawak
MIRI: Berindik ari penambah kes igi penyakit COVID-19 di nengeri tu, kelebih agi kenyau berapa hari ti udah, nyadika Sarawak ngerikodka kes ti pemadu tinggi dalam menua tu, lalu tu mega udah ngujungka mayuh penemu rama ti dekaka chara ti efektif agi ari raban ti bekuasa.
Aktivis komuniti ti mega siku ari penulis ti tebilang ditu, Jaya Ramba madahka prosedur operasyen standard (SOP) enggau neruska pengawa nagang pemindah entara pelilih menua lalu ari sukut tu nya enda chukup.
Perintah nengeri nengah Komiti Mutarka Penusah Ngenyit Nengeri Sarawak (JPBNS) patut ngiga sereta neritka atur ti efektif agi.
“Aku minta perintah nengeri neritka atur sentang pengelantang rayat mindah di tetiap pelilih menua sereta bagi menua ditu.
“Enti ulih tagang pemindah rayat semina dalam radius 20km aja ba tetiap kandang menua. Ungkup sida ti mansang gawa ba palan ti lebih ari radius nya, patut bisi penerang betulis ke sah ari pengaji,” ku iya.
Bejaku ngagai Utusan Borneo ditu kemari, iya madahka ‘penglantang’ mindah ti diberi ngagai rayat, deka ngagai sekeda palan ari siti kandang endur ke siti kandang endur ti nadai tuju ke berat, udah ngujungka kes tu ngelekai lalu majak nambah di nengeri tu.
“Nama agi, bisi rayat ti bulih i-Sinar udah melanjaka duit ke palan rama tauka bebelika barang ti enda ngira SOP ke udah ditetapka Opis Menteri Pengerai,” ku iya.
“Kenyau ari dua minggu ti udah, kes COVID-19 di Sarawak majak nyadi laban penendu sentang pemindah rayat, ti kin kia.
“Nyema pemindah rayat tu enda ditagang, nyangka penambah kes COVID-19 ulih majak agi di Sarawak, taja di nengeri bukai udah majak nurun,” ku iya nambah.
Bekaul pengawa meri vaksin, ku Jaya madah, kelimpah ari raban terabai menua, iya merambu, staf perintah baka sida ti meri bil utiliti baka ai enggau elekterik ari rumah ke rumah mega patut dikemerat.
Pia mega ungkup bala pengajar di mengeri enggau menua pesisir, ku iya seraya nambah iya nya pengawa meri vaksin tu patut ngaul raban di kaunter baka opis ai, elekterik, bank enggau opis ti suah digulu mensia mayuh maya jam orang gawa.
“Aku pechaya nyema kitai ulih nyakahka sereta neritka agi SOP, kitai ulih nentuka penyampau kes COVID-19 ti nyadi tu ulih dikurangka,” ku Jaya madah.