Permit ngimport gula betapis tau dipinta sebarang maya
KUCHING: Kompeni ngeluarka pemakai enggau ai irup sereta pemurung nengeri tu tau minta permit ngimport gula betapis enda ngira maya semanjai taun.
Menteri Dagang Dalam Nengeri enggau Pekara Penguna (KPDNHEP), Dato Sri Alexander Nanta Linggi madah, peminta nya ulih diperundingka enggau silik siti Komiti Pemerati ti diarika beberapa ejensi perintah nyengkaum Opis Menteri Dagang Antarabansa enggau Industri (MITI), Lembaga Pelaburan Perindusrian Malaysia (MIDA) enggau Opis Kastam Diraja Malaysia.
Iya madahka bida rega ti lebih baruh ulih diasaika kompeni ngeluarka pemakai enggau ai irup ti nadai bekaul enggau perintah.
“Bekaul enggau isu gula, ke bendar iya rega nyual gula domestik dijaga ngena reka maksimum sepenyampau RM2.85 per kg ungkup gula putih betapis kasar enggau RM2.95 per kg gula putih betapis alus enti dijual nengah chara runchit.
“Lalu rega burung gula ke guna industri pemakai enggau ai irup ditetapka enggau penyampau RM2.77 per kg ungkup gula putih betapis kasar enggau RM2.85 per kg gula putih betapis alus.
“Bida rega gula ti lebih murah ulih diasaika kompeni ngeluarka pemakai enggau ai irup bepelasarka kuantiti enggau chara meli ti disetuju enggau pemekal, sereta bepanggai ba rega gula mata ba makit dunya ti na dai bekaul enggau perintah,” ku iya.
Nanta meri penerang nya kena nimbal sebengkah ripot berita apin lama, ti madah perintah ke diatu enda tentu beratka industri pemakai enggau ai irup enti dibandingka enggau perintah ke sebedau tu, ti ngujungka industri tu ngeluarka belanja lebih dikena meli gula betapis ngena rega RM2.75 per kg.
Lebuh ti ngenang silik bekaul enggau atur nyaga ba pengawa ngemendarka ngimport, iya madahka pengawa matau deka terus dipejalaika ngagai penerima permit ngimport gula betapis kena nyeliahka salahguna.
Ukum deka ditinggang enda ngira sapa ti sah ngena permit ngimport gula betapis, ku iya.
Apin lama udah, Kaban Parlimen Stampin Chong Chieng Jen ti kala nyadi Sapit Menteri Dagang Dalam Nengeri enggau Pekara Penguna mantaika isu subsidi gula kelimpah ari minyak sumai 1 kilogram.
Berindik ari nya, Nanta beterima kasih ke pengibuh ti dibantaika Chong bekaul enggau isu subsidi minyak bepanduk 1 kilogram enggau gula tu.
“YB Chong ti kala nyadi sapit menteri tu udah tentu ulih meretika polisi opis menteri bekaul enggau dua komoditi tu.
“Aku mega arap bendar YB Chong nemu baka ni chara raban penerit adat KPDNHEP seruran bejalaika pengawa matau sereta nentuka bekal minyak sumai enggau gula enda putus bekal ba pasar,” ku iya.