Bisi siti kluster baru COVID-19, dua kluster udah abis di Sarawak: JPBNS
KUCHING: Bisi siti kluster baru COVID-19 enggau dua kluster ditukuka udah abis berindik ari nadai ngerikodka kes baru, ku Komiti Mutarka Penusah Ngenyit Nengeri Sarawak (JPBNS) kemari.
“Sehari tu, Opis Pengerai Nengeri Sarawak udah ngenukuka dua kluster udah abis iya nya Kluster Pasai, Sibu enggau Kluster Buloh, Selangau pengudah nadai kes baru ditemu bekaul enggau kluster tu dalam timpuh 28 hari ke udah.
“Lalu sehari tu mega Opis Pengerai Nengeri Sarawak udah ngenukuka siti agi kluster baru iya nya Kluster Jalai Puncak Borneo, Kuching.
“Kluster Jalai Puncak Borneo, Kuching adalah siti kluster ba endur kereja ti bekaul enggau rampit COVID-19 ba raban pelatih Palan Pematih Polis (PULAPOL) ba jalai Puncak Borneo, Kuching, Sarawak,” ku JPBNS nengah penerang berita, kemari.
Kes indeks ngagai kluster tu iya nya kes ke-19,697 iya nya siku pelatih palan pematih nya ti udah diperesa nengah pengawa meresa individu, bisi tanda kena 9 April 2021 ba Klinik Pengerai Kota Sentosa, Kuching.
Kes ti berengkah tabin kena 8 April 2021 enggau ditukuka rampit COVID-19 kena 12 April 2021.
Kes asal ari menua Perlis datai ke Sarawak kena 22 November 2020 lalu udah dikuarantin maya datai ba palan pematih nya.
“Berampit ba entara sida pelatih PULAPOL bepun ari begulai enggau pangan diri sereta kurang ngemeranka seraka fizikal entara pelatih ke diau ba buding platun enggau kompeni ti begulai mayuh.
“Asil ari pansik silik enggau meresa kontak semak enggau bakih ti sama enggau belatih ngagai kes indeks tu, bisi 111 individu udah diperesa bekaul enggau kluster tu sereta ri penyampau nya bisi 61 kes ditemu positif COVID-19 nyengkaum kes indeks, 50 iku negatif enggau nadai kes nganti pemutus peresa makmal,” ku JPBNS seraya madahka semua kes positif kluster tu udah dipasuk ba Sepital Besai Sarawak enggau PKRC di Kuching.
Naka kemari bisi 48 kluster COVID-19 ti agi aktif.
Nambahka nya, JPBNS kemari ngeripotka Pelilih Menua Saratok udah betukar status ari Oren ngagai Mirah pengudah ngerikodka sepenyampau 61 kes berampit ba pelilih menua tu dalam timpuh 14 hari ke udah.
Tu ngujungka penyampau semua pelilih menua bestatus Mirah nambah nyadi 15 pelilih menua sereta kelimpah ari nya bisi empat bestatus Orang, 16 pelilih menua agi bestatus Kuning enggau lima agi ba status Gadung.
Kelimpah ari nya, nengah penerang berita ti sama JPBNS madahka semina premis dagang ti bejalaika dagang runchit enggau barang pemakai aja dikemendarka beoperasyen nyentuk pukul 12 tengah malam.
“Premis hybrid (pemakai enggau pemerindang), semina operasyen makai dikemendarka nyentuk pukul 12 tengah malam, lalu aktiviti pemerindang patut diketuka pukul 10 malam,” ku JPBSN madah entara pekara diputuska ba aum komiti nya kemari.