CUEPACS Sarawak ngarapka peminta mansik baru SSM diperundingka enggau lengkas
KUCHING: Kongres Kesatuan Pekerja-Pekerja Di Dalam Perkhidmatan Awam (CUEPACS) Nengeri Sarawak (CNS) ngarapka Menteri Besai (PM) Tan Sri Muhyiddin Yassin tau berundingka enggau lengkas penemu ti minta mansik baru Sistem Saraan Malaysia (SSM) ke pengelantang orang ti gawa perintah.
Chairman CNS Ahmad Malie madah, CNS nyukung peminta Presiden CUEPACS Adnan Mat ngambika SSM dipansik baru nitihka gaya ekonomi diatu.
CNS nyukung pekara nya laban isu tu lama udah dibantaika CUEPACS ngagai perintah, tang lalu apin diperundingka.
“Laban YAB PM kitai ke diatu siku orang ti ngemeratka rayat sereta ibuhka penanggul rayat nengah pengawa mantaika mayuh bengkah insentif maya pandemik COVID-19 sebedau tu, nya alai CNS mega minta YAB PM berundingka peminta tauka apil orang ke gawa perintah, ti minta SSM tu dipansik baru sereta dipejalaika enggau lengkas.
“Isu tu udah kelalu lama sereta chukup dikearapka orang ke gawa ba opis perintah ti ari baruh CUEPACS, tang lalu apin nyadi nyata.
“Sinu agi, mayuh agi orang ke gawa opis perintah udah pinchin enggau enda sempat ngasaika bayar tambah SSM tu,” ku iya madah ngagai Utusan Borneo.
Ku iya bepelasarka gaya ekonomi diatu, CNS amat ngarapka pekara nya tau dipeda baru.
“Bepelasarka gaya ekonomi diatu,CNS amat ngarapka perintah ari baruh iring YAB Tan Sri Muhyiddin Yassin ke nyadi Menteri Besai diatu tau berundingka enggau lengkas ke penemu CUEPACS ti minta mansik baru SSM ke pengelantang orang ti gawa perintah,” ku Ahmad.
Apin lama, Presiden CUEPAC Adnan Mat meri langgur penemu ngagai perintah ngambika mansik baru SSM dikena orang ke gawa opis perintah kena napi peminta ekonomi enggau ungkup pengidup tiap hari diatu.
Adnan dalam penerang madah, kebuah pia laban SSM nadai kala dipansik tauka dikemanahka baru kenyau ari dipejalaika berengkah ari bulan November 2002.
“Pansik baru SSM tu patut dipejalaika enggau lengkas laban skim tu ditumbuh bepelasarka gaya ekonomi enggau umgkus pengidup urung taun 2002 lalu diatu tau dikumbai enda setipak enggau gaya ekonomi ke diatu.
“Dalam timpuh 19 taun tu, kitai betapi enggau mayuh penambah ba ungkus pengidup nyengkaum rega rumah ti kelalu mar,” ku iya dalam penerang, bepelasarka ripot ari Bernama, apin lama.