Rayong: Terangka nyemetak reti ‘wilayah’ ngagai Sarawak
Nya nyaruka runding lalu rayat deka nemu status Sarawak kelebih agi ba pengawa numbuhka Malaysia ba taun 1963
“
Isu tu balat sensitif lalu PSB ti nyadi sebuah parti menua tu ti diarika pupu bansa beratka ubah ba reti nya, laban nya tentu deka meri empas ke besai ngagai
”
Sarawak jemah ila.
Dr Johnical Rayong Ngipa
Ketuai Nembiak Parti Sarawak Bersatu (PSB)
KUCHING: Perintah Besai mesti nerang enggau silik bekaul isu ‘wilayah’ ngagai Sarawak kena nyeliahka polemik politik nyadi belama kelebih agi ba 2.8 juta rayat Sarawak.
Ketuai Nembiak ke mega Sapit Presiden Parti Sarawak Bersatu (PSB) Dr Johnical Rayong Ngipa lebuh dirandau Utusan Borneo madah, berengkah ari isu nya nyadi mayuh tanya ari rayat bekaul status Sarawak kelebih agi sentang pengawa numbuhka Malaysia dalam bulan September taun 1963.
“Mayuh orang nemu Sarawak suba sebuah menua begulai enggau Malaya, Sabah sereta Singapura numbuhka Malaysia sebedau Singapura matak diri ari gempung nya.
“Udah nya Sabah enggau Sarawak nyadi nengeri begulai enggau 13 ke bukai baka Kedah, Selangor, Pulau Pinang, Kelantan enggau nengeri bukai numbuhka menua Malaysia ,” ku iya.
Ku Dr Rayong, perintah besai mesti meri penerang silik sentang isu nya laban rayat deka nemu status enggau pemaik ke diulih pengudah Sarawak betukar status ari sebuah nengeri ngagai sebuah ‘wilayah’.
“Isu tu balat sensitif lalu PSB ti nyadi sebuah parti menua tu ti diarika pupu bansa beratka ubah ba reti nya, laban nya tentu deka meri empas ke besai ngagai Sarawak jemah ila,” ku iya.
“Kami deka ke perintah kelebih agi Gabungan Parti Sarawak (GPS) meri penerang sentang isu tu ti dikerembaika media sosial sereta enda nejuka rayat majak nanyaka status Sarawak jemah ila.
“Jaku ti madahka Sarawak nyadi ‘wilayah’ tau dikumbai nyaruka runding sereta dipejuraika raban virtual.
“Sida deka nemu reti leka jaku ‘wilayah’ sekalika mai reti baka penumbuh Wilayah Persekutuan Kuala Lumpur, Putrajaya enggau Labuan,” ku iya.
Tambah Kaban Kunsil Nengeri Engkilili nya baru, Sarawak ari suba amat konsisten deka diaku nyadi sebuah menua tang ukai wilayah, nya kebuah PSB enda begilik penemu.
“Isu tu udah lama nyadi... nya alai GPS ke nyadi perintah ke diatu mesti megai tanggungpengawa mulaika hak Sarawak nitihka Sempekat Malaysia 1963 (MA63) nyengkaum hak eksklusif minyak enggayu gis baka ke dalam PDA74,” ku iya.
“Perintah besai patut nemu sentimen kitai, iya nya Sarawak bisi enggau numbuhka Malaysia ba taun 1963 lalu nya mesti dititihka, nya alai PSB beratka tetiap pekara ke bisi dalam sempekat nya.
Ku iya, sebarang peminta nukar Sarawak ari negeri ngagai wilayah, mesti nengah proses bejuraika penemu di DUN Sarawak dulu ngagai renggat dikemendar sebedau dipejuraika ba renggat Parlimen.
“Tanya diatu, sekalika pengudah nyadi wilayah, hak eksklusif Sarawak baka ke bisi dalam MA63 enggau PDA74 deka dipulaika,” tanya iya.