Rayat di Saratok dilalau nitihka SOP
KUCHING: Rayat kelebih agi ba menua Saratok terus dilalau sereta diperansang nitihka prosedur operasyen standard (SOP) ti udah ditetapka perintah dikena nagang COVID-19 ari majak berampit.
Sapit Menteri Kuasa enggau Pengeraja Asal, Datuk Ali Biju minta kelebih agi peranak rumah panjai dalam menua Saratok, patut berat agi ngemeran sereta ngemeratka SOP nya berindik ari pelilih menua Saratok udah betukar ngagai status Mirah ari Oren pengudah ngerikodka 61 kes dalam timpuh 14 hari ke udah ensanus.
“Sekeda rumah panjai mega udah dipejalaika atur lockdown baka Rh Thomas, Sg Brangan, Rh Jonathan, Licok enggau Rh Junaidi, Disso.
“Aku ngarapka semua peranak rumah panjai tu meri kerejasama penuh ngagai terabai menua ti bejalaika pengawa.
“Aku deka bebendar madah ngagai kita ngambika seruran nitihka SOP ti udah ditetapka perintah. Diatu kitai patut lebih bejaga awakka ulih nagang pengelekai COV
ID-19,” ku iya ti mega Kaban Parlimen Saratok nengah sebengkah penerang.
Berebak enggau tu Ali ngingatka peranak rumah panjai ngambika enda ibuh mindah ke bukai nyema nadai pekara berat deka diaduka.
“Besaup kitai dalam sampi enggau bekerejasama ngelaban pengelekai COVID-19 di Saratok, ukai pekara muntang ba sida raban terabai menua tang kitai ke nyadi peranak menua Saratok patut sama bejalaika tanggungpengawa ngelaban pengelekai tu .
“Kitai ngarapka pandemik tu ulih punas jampat awakka pengidup enggau ekonomi menua kitai pulai baru baka selama,” ku iya ti mega Kaban Kunsil Nengeri Krian.
Ba penerang berita ti sama, iya mega ngelalau rayat nyengkaum peranak ba Saratok ngambika ngerejista diri nerima tuchuk vaksin COVID-19 nengah aplikasyen MySejahtera tauka nengah tuai raban bansa.
Nitih ku iya ,vaksin COVID-19 renggat kedua enggau ketiga program vaksinasyen disadang deka berengkah kena 19 April tu.
“Program vaksinasyen tu iya nya chara keterubah kitai nyapai raban imuniti,” ku iya.