PKPB di serata Sarawak ari 13 - 24 April
KUCHING: Komiti Mutarka Penusah Ngenyit Nengeri Sarawak (JPBNS) deka majak bejalaika Atur Mindah Betagang Bisi Penetap (PKPB) berengkah ari 13 ngagai 24 April 2021 di serata Sarawak.
Sapit Kepala Menteri, Datuk Amar Douglas Uggah Embas madah, komiti ngaga pemutus enda bejalaika Atur Nagang Pemindah (PKP) laban ti irauka penau enggau pengasi adat ti diteritka ba kandang menua ti lebih besai.
Dalam timpuh ti sama ku iya, JPBNS mega deka neruska Atur Mindah Betagang Diteritka Agi (PKPD) ba kandang menua ti bisi risiko tinggi.
"Komiti Mutarka Penusah Ngenyit Nengeri Sarawak (JPBNS) deka terus bejalaika Atur Mindah Betagang Bisi Penetap (PKPB) berengkah 13 ngagai 24 April 2021 di serata Sarawak, baka ti udah dipadah beberapa hari ke udah.
"Pengudah berandau enggau Kaunsil Pengelikun Menua (MKN), udah disetuju iya nya pelilih menua Kuching, Sibu, Bintulu, Miri enggau Meradong agi tetap ngemeranka atur nya ari baruh PKPB.
"Bepelasarka peneleba Sarawak, bejalaika PKPB ngena SOP ti nya enggau terit, nya ngasi agi kena ngurang enggau ngetuka pengelekai pandemik tu," ku iya.
Uggah ti mega Chairman JPBNS nerangka pekara nya ba aum pengarang berita COVID-19 Sarawak ti diatur ba Begunan DUN lama ditu, kemari.
"Siti ari pengirau besai JPBNS lebuh bejalaika PKP iya nya pengulih enggau pengasi adat ti diteritka ba kandang menua ti lebih besai. Tu bepelasarka penelaba PKP di Sibu apin lama (berengkah 15 Februari ngagai 1 Mac 2021)," ku iya.
Bejaku baru, iya madahka PKPD nyamai agi diadu sereta diteritka kelebih agi ba kandang endur 'tekurung'.
"Dalam timpuh ti sama, lebuh kandang genturung pendiau enggau rumah panjai bisi kna rampit, 'lockdown' deka dipejalaika enggau lengkas ba endur tu.
"Tu udah sereta deka mantu raban penyaga pengelikun/ penerit adat bejalaika pengawa nagang pemindah enggau mudah sereta ngasi agi.
"Nya alai, JPBNS udah ngenukuka dua PKPD ba flat Sibujaya enggau Rumah Sentosa di Sibu sereta PKPD ba 152 rumah panjai. Naka ke sehari tu, 144 PKPD udah diketuka lalu 10 agi dalam PKPD," ku iya.
Nitihku iya, PKPD udah mujur nurunka kes positif enggau nagang rampit ba kandang endur nya sereta nadai ngeruga aktiviti ekonomi ba kandang menua bukai.
Di Sarawak, JPBNS udah bejalaika 487 PKPD kenyau ari bulan Januari 2021 lalu bisi 401 PKPD udah diketuka.
Bisi 77,303 iku udah diperesa ba kandang endur ke dipejalaika PKPD, lalu ari penyampau nya bisi 4,573 ditemu positif.
Iya mega madahka JPBNS udah meri kuasa ngagai Komiri Mutarka Penusah Ngenyit Bagi Menua (JPBB), ngambika bejalaika perati risiko rampit ba bagi menua diri empu enggau meri penemu, nama SOP ti pemadu engkeman kena nagang pengelekai enggau rampit ba bagi menua nya.
"JPBNS ngemendarka SOP ti udah dipansutka JPBB Bintulu enggau Sibu," ku iya.
Kelimpah ari nya Uggah madahka entara pemutus ke digaga komiti kemari iya nya, PKPD dipejalaika ba Rh Bajak, Ng Semawang, Julau berengkah ari 14 April ngagai 27 April 2021, berindik ari bisi kontak semak kes positif ba Pelilih Menua Julau.
Nambahka nya, PKPD mega dipejalaika ba Rh Nanggai Sungai Stok, Sarikei berengkah ari 15 April ngagai 21 April 2021 enggau ba PULAPOL, Kuching berengkah 16 April ngagai 29 April 2021.
"Berindik ari kes ti ditemu ba Bagi Menua Bintulu majak nambah, JPBNS udah ngemendarka garis lalau (SOP) tambah ungkup PKPB Bagi Menua Bintulu berengkah ari 14 April ngagai 27 April 2021," ku iya nyebut entara pekara diputuska ba aum komiti nya kemari.
Sama bisi ba aum pengarang berita nya, Menteri Kaunsil Kandang Menua enggau Pengawa Berumah, Dato Sri Dr Sim Kui Hian enggau Direktor Opis Pengerai Nengeri Sarawak Dr Chin Zin Hing.