KKM deka nganjung lebih 300 iku pengereja pengawa ke Sarawak

PUTRAJAYA: Bisi 430 pengereja pengawa Opis Menteri Pengerai (KKM) deka dianjung ke Sarawak kena 21 April tu (Hari Tiga) kena nambahka pengereja pengawa opis pengerai ngelaban pengelekai pandemik COVID-19, pia ku Menteri opis nya Datuk Seri Dr Adham Baba.

Ku iya pemutus nambahka pengereja pengawa nya digaga pengudah iya nemuai ke Sarawak kena Hari Satu enggau Dua nyin tadi nyengkaum ngabas Palan Kuarantin enggau Perubat COVID19 di Stadium Perpaduan, Kuching.

“Nitihka gaya ke dipeda ari penemuai nya, kami beratika bisi pematut lengkas nambahka pengereja pengawa opis pengerai ke Sarawak. Penambah nya deka dipejalaika enggau chara berenggat ,” ku iya ba aum media pengudah ngelancarka bup Malaysia Health Sector Response to COVID-19: Perspectives From The Field ba opis menteri iya,ditu kemari.

Kemari, Sarawak ngerikodka 489 kes baru COVID-19, ke alai Kluster Tembok Sri Aman enggau Kluster Jalai Puncak Borneo nyadi pun kes positif.

Dr Adham madah, nitihka penerang ke digumpul, Sarawak begunaka urung 1,436 iku pengereja ari opis pengerai nyengkaum pemesai perubat, penulung pemesai perubat, pemesai sains mikrobiologi, indu misi enggau deriba.

“Semua pengereja pengawa opis pengerai ti deka dianjung (ke Sarawak) nya ari raban ke udah dituchuk dua dos vaksin COVID-19,” ku Dr Adham.

Nitihka padah Dr Adham, nyauka 600,000 iku pengereja pengawa terabai menua udah dituchuk dos keterubah vaksin COVID-19 lalu nyauka 470,000 iku udah ngambi dua dos.

Bekaul enggau penyampau kes nitihka pelilih menua di Sarawak, ku iya ungkup timpuh 1 April nyentuk kemari, pelilih Meradong ngerikodka penyampai ti pemadu mayuh iya nya 771 ditangkanka Julau (605), Bintulu (556), Kapit (387), Beluru (343) enggau Sibu (283).

“Tu mih entara pelilih menua ti ngembuan penyampau kes ti mayuh ngelui average nengeri iya nya per 100,000.Nya alai KKM deka nganjung mayuh agi pengereja pengawa ngagai kandang menua nya. Kelimpah ari nya, KKM mega deka nganjung pengereja pengawa opis pengerai ari pelilih menuti nadai kes baka Simunjan, Pusa enggau Lundu,” ku iya.

Bekaul enggau vaksin AstraZeneca I deka dikena, Dr Adham madahka pemutus nya deka dipadahka pengudah aum Komiti Khas Jamin Akses Bekal Vaksin COVID19 (JKJAV) minggu baru.

Media mantaika ripot madahka Denmark kena hari Dua (13 April) mansutka pemutus badu ngena vaksin AstraZeneca, ti ngujungka menua nya nyadi menua keterubah Eropah ngambi pemutus nya ketegal irauka bisi penanggul pengerai bukai tau nyadi ketegal vaksin nya.