Bisi 512 kes baru, dua kes pemati ketegal COVID-19 di Sarawak kemari
KUCHING: Bisi 512 kes baru COVID-19 enggau dua iti agi kes pemati ketegal rampit COVID-19 di Sarawak, kemari.
Sapit Kepala Menteri, Datuk Amar Douglas Uggah Embas madah naka kemari, nya ngujungka penyampau semua kes positif COVID19 nambah nyadi 21,960 kes enggau kes pemati nambah nyadi 135 iku.
"Sehari tu bisi 512 kes baru COVID-19 ditemu ba Sarawak. Pelilih menua ti ngeripotka kes iya nya pemadu tinggi Bintulu (120) lalu ditangkan Sibu (99), Subis (80), Kuching (56), Miri (31), Kapit (30), Meradong (29), Serian (22), Kanowit (10), Samarahan (9), Sarikei (7), Bukit Mabong (6), Limbang (3), Kabong (2), Asajaya (1), Bau (1), Belaga (1), Beluru (1), Julau (1), Saratok (1), Song (1) enggau Sri Aman (1).
"Kes pemati ke-134 bekaul enggau kes ke-16,167 iya nya siku lelaki peranak menua (Sarawak) beumur 61 taun ti dipasukka ba Sepital Sibu laban ti bisi tanda tabin, batuk enggau begunaka bantu seput.
"Kes pemati ke-135 bekaul enggau kes ke-18,273 iya nya siku lelaki peranak menua (Sarawak) beumur 71 taun ti dipasukka ba Sepital Miri laban bisi tanda batuk enggau tusah enseput sereta begunaka bantu seput," ku iya.
Uggah ti mega Chairman komiti Mutarka Penusah Ngenyit Nengeri Sarawak (JPBNS) mansutka pekara nya ba aum pengarang berita COVID-19 Sarawak ti diatur ba Begunan DUN Lama ditu, kemari.
Ngenang kes pemati ke134, ku iya, kes diperesa ngena ujian2021, lalu tikas pengerai kes majak enda manah enggau ditukuka udah nadai kena 14 April 2021 kelimpah ari nya bisi ko-morbid penyakit darah tinggi enggau penyakit batuk rangkai (Tuberculosis).
Kes pemati ke-135 diperesa ngena rT-PCR sereta ditemu positif COVID-19 kena 6 April 2021, lalu tikas pengerai kes majak enda manah enggau dituku udah nadai kena 15 April 2021 kelimpah ari kes bisi ko-morbid penyakit darah tinggi.
Nambahka nya, Uggah madah kemari bisi 409 kes baru gerai sereta dikemendarka pansut ari PKRC Sepital Sibu (207), PKRC Sepital Miri (57), Sepital Sarikei (45), Sepital Besai Sarawak (38), Sepital Bintulu (25), PKRC Sepital Kapit (13), Sepital Sri Aman (7), PKRC Betong (5), PKRC Mukah (4), PKRC Serian (4), Hospital Limbang (3) enggau PKRC Semuja (1).
"Tu nyadika penyampau semua kes positif COVID-19 gerai sereta dikemendarka pansut ari sepital naka sehari tu bisi 17,288 iku tauka 78.72% ari penyampau semua kes COVID-19 di Sarawak," ku iya.
Kemari bisi 508 PUI baru diripotka enggau siti PUI agi nganti pemutus peresa makmal.
Kelimpah ari nya, Uggah kemari madah Pelilih Menua Bukit Mabong betukar status ari Kuning ngagai status Oren pengudah ngerikotka sepenyampau 26 kes berapit ba pelilih menua tu dalam timpuh 14 hari ke udah.
Berindik ari pekara nya, penyampau semua pelilih menua status Oren nambah ngagai lima pelilih menua lalu pelilih menua ba status Kuning nurung ngagai 16 pelilih menua.
Limabelas pelilih menua agi ba status Mirah enggau empat pelilih menua agi ba status Gadung (Telang Usan, Lundu, Pusa enggau Simunjan.