Stolport deka nyadi pengemun ubah negapka industri betanam betupi, pemansang di Betong
KUCHING: Tiga puluh taun suba, engka didinga nyelai enti bisi orang meri langgur penemu ngaga padang bilun ti jauh ari kandang endur ke bisi pemansang baka Bagi Menua Betong, tang enggau potensial palan tu, padang bilun nya diatu beguna kena ngangkut asil betanam betupi ngagai makit ke besai agi, nyengkaum ke menua tasik.
Perambu benung dipejalaika kena ngaga padang bilun pandak ti khas alai bekejang enggau sangkai (Stolport) di Spaoh, siti ari pasar ke pemadu mit di Betong, lalu kena Hasri Enam nyin tadi, Kepala Menteri Datuk Patinggi Abang Johari Tun Openg nyuaka dokumen sempekat padang bilun nya ngagai kompeni ti mujur bulih tinda ngaga projek nya, D.A.L Keluarga Realty Cara Raya JV Sdn Bhd.
Pengawa ngaga padang bilun ke beungkus RM108.1 juta nya deka nyadi pengemun ubah kena negapka industri betanam betupi di Betong, lalu dipelabaka tembu digaga dalam timpuh 30 bulan.
Pengelama betaun, asil betanam betupi ti ari Betong, ke urung 250km ari indu nengeri Sarawak, Kuching, diangkut ngena lori ke semina nyadi chara ngangkut nya ngagai pasar ditu.
Pengelama pejalai urung lima nya, deka nyadi pilih sekunder enti Stolport udah beroperasyen endar, pia ku Sapit Kepala Menteri Datuk Amar Douglas Uggah Embas.
Nengah pemisi akses bilun, Uggah ke mega Kaban Kunsil Nengri Bukit Saban, madahka asil betanam betupi baka buah enggau sayur ari Betong ulih dianjung jampat agi sereta agi baru lebuh diterima penguna.
“Kami mesti jampat nambahka asil ti dipansutka berengkah ari diatu, laban dalam timpuh tiga taun, Spaoh Stolport udah sedia ‘nerebaika’ produk kami ngagai makit,” ku iya.
Pengawa nambah manah dalam sistem pengangkut sereta peransang nambahka asil nyadi siti ari visyen Perintah Sarawak kena ngemansangka Betong nyadi palan betanam betupi moden sereta ngemujurka nya nyadi siti ari bakul pemakai nengeri nyerumba taun 2030.
Ku iya, ikan tilapia Sarawak eng sayur miding bisi peminta ari sekeda menua baka Singapura.
Kena mutarka peminta tu, iya madahka perintah nengeri udah ngemunka sekeda projek di Betong, nyengkaum ngaga palan ngumpul, memproses enggau mungkus produk betanam betupi (CPPC) nyengkaum stesyen inkubator orang dagang.
Uggah ke mega Menteri Betanam Betupi Moden , Tanah Adat enggau Pemansang Wilayah nengeri madahka CPPC ngenauka orang bumai bekebun nyual produk sida baka sayur, buah rambutan, nyiur, nenas enggau rian maya asil ke dikarang sida nya mayuh.
“Stesyen inkubator deka dipejalaika pemesai Opis Betanam Betupi, mega deka ngelatih orang indu di Betong sentang ngaga bakeri enggau konfeksioneri,” ku iya.
Kelimpah meri fokus ngagai pengawa betanam betupi, perintah nengeri mega deka numbuhka palan komersial baru, numbuhka klinik, begunan perintah enggau projek berumah, ku iya seraya ma dahka jematan mega deka dihgaga kena meraka Sungai Paku, ti nyadi sebagi ari perambu ngenyit kena ngangkatka infrastruktur di Spaoh, ku iya.
"Pelin tu mega nyengkaum numbuhka palan bejalaika pengawa perintah baru, nambah manah sistem parit enggau entali ai sereta ngaga mayuh agi jalai kena nempa rentayan ti deka ngemudahka mobiliti ungkup rayat Spaoh bejalaika aktiviti ekonomi enggau sosial sida,” ku iya.
Ku Uggah, nengah perambu ke udah bisi tu, Betong ke mega siti ari 12 bagi menua di Sarawak deka ngasaika pengerembai pemansang enggau peluang nyengkaum pemansang ke manah agi ti deka meri pemaik ngagai lebih 100,000 iku peranak di menua nya.