SRDC pechaya ulih nagang pengelekai COVID-19 nengah kerejasama semua
SIBU: Opis Kaunsil Pelilih Menua Pesisir Sibu (SRDC) enggau kerejasama semua raban sereta ejensi terabai menua deka nentuka kes COVID-19 ari baruh pegai nya ulih dijaga.
Chairman SRDC Sempurai Petrus Ngelai madah, SRDC dekaka sitak ari baruh pegai sida agi ulih dijaga lalu nadai kes mit ti ulih ngujungka aksyen ke drastik digaga.
Ku iya, SRDC enggau ejensi penerit adat baka polis, soldadu enggau ke bukai baka RELA benung bebendar nentuka pengelekai igi penyakit COVID-19 ulih dijaga lalu mega ulih ditagang.
“Nya alai, diatu kitai ngarapka semua raban patut beratika pekara tu enggau bebendar.
“Sida ke enda tau pansut ari rumah, teruska diau di rumah,” ku iya kemari.
Iya bejaku munyi nya lebuh ti dipinta meri buah runding bekaul enggau Atur Nagang Pemindah (PKP) berengkah 16 April nyentuk 26 April ti deka datai ti ngaul peranak ke diau di kandang menua Zon 1 nyentuk 7 ba pelilih menua Sibu.
Kandang menua tu iya nya ba sitak Sukun/Lada, Mantis, Poh Yew, Bukit Lima, Tong Sang, Pusat Bandar enggau Tiong Hua.
Nitih ku Sempurai, Komiti Tetap Pengawa Belisin enggau Dagang SRDC mega mutuska enda ngemendarka pasar tamu enggau pasar malam di Selangau, Stapang sereta Sibu Jaya dibuka.
Ku iya, taja bisi peminta deka muka pasar tamu enggau pasar malam tang SRDC patut patut beratika enggau silik agi pengudah meda kes baru COVID-19.
“Opis kaunsil mutuska deka nitihka jaku tangkan ari Komiti Mutarka Penusah Ngenyit Bagi Menua (JPBB) Sibu kena nentuka pengelikun bala pedagang sereta penguna sida terus dijamin,” ku iya nerang.
Ku iya, SRDC endang nemu pematut bejalaika pengawa dagang dalam nambahka penatai pemisi ngagai bala pedagang.
Taja pia, ku iya nerang, pengelikun pedagang enggau penguna sida endang dikemerat nyentuk ngaga pemutus nutup kededua sektor nya.