GPS chakah bejalaika pemansang di sitak DUN Simanggang
SRI AMAN: Pemansang ti benung dipejalai di sitak Kunsil Nengeri (DUN) Simanggang ti dikemansang Perintah Gabungan Parti Sarawak (GPS) nyata mantaika kandang menua nya mega benung chakah mansang ba sitak DUN ke bukai di nengeri tu.
Tu mwga nyata nengah sekeda projek Program Transformasyen Menua Pesisir (RTP) di kandang menua tu nyengkau Projek PRT Taba rumah panjai baru, Rumah Sabong Akong, Bayai Baru, Sri Aman ke diatu udah 50 peratus tembu.
Kaban Kunsil Nengeri (ADUN) Simanggang Datuk Francis Harden Hollis madah, taba rumah panjai tu ulih endur 20 pintu tauka ruang bilik ke digaga ba atas tanah Tuai Rumah Sabong iya nya rumah panjai baru ke udah dikemendarka duit jali berumah sepenyampau RM30,000 tetiap pintu tauka ruang bilik ke nyadi pun kena nirika rumah panjai baru nya.
Ku Harden nambah, Tuai Rumah Sabong Akong, Kampung Bayai Baru tu bisi 23 pintu ari baruh pegai iya ti endang nitihka perintah diatu GPS di Sarawak.
“Iya udah ngaga pemutus ti betul enggau nyukung perintah diatu ti endang udah ditemu seruran mantu rayat enggau mayuh macham chara dalam nyendiaka perengkaguna,” ku Harden lebuh ti ditemu pengudah matau ngagai palan projek nya bedau lama ti udah.
Kelimpah ari nya, Harden ke mega Menteri Muda Pengelantang Komuniti Sarawak madahka, projek RTP Ngaga Baru Jalai di Rumah Rangga Angkom, Kampung Sungai Tenggak B mega deka dipejalaika enda lama agi.
“Pakej projek ti beungkus RM350,000 tu mungkur jematan ti meraka Sungai Klassen. Projek nya udah diberi ngagai Bumi Makmur Enterprise nengah proses nyabut undi.
“Meretika pemansang ti beungkus besai chakah dipejalai di sitak Undop enggau ngaga jalai akses sereta jematan ungkup tuju neresa tanah baru ungkup pengawa betanam betupi, bisi individu penyakal ti ngaga diri ngaku pemansang perintah GPS laban sida dalam raban ti ngembuan runding ‘ngenggaika pemansang’ ke enda ulih nerima penyulut pengari rayat GPS,” ku iya.
“Aku berasai sinu enggau sekeda Tuai Rumah ti ulih dipegunaka penyakal nyadi platform kena menchi perintah. Sida tu entara Tuai Rumah ti asa ati lalu enda bulih penawar nya. Pia mega sida ti ngemansutka penerang menchi perintah ti enda sedar iya nya perengkaguna ke diguna ngelama tu asil ari perintah.
“Bisi Tuai Rumah ke madah kediri pandai madahka agih belanja nya datai ari chukai ke diambi ari rayat. Tang sida enda ngerundingka nyema pengari rayat nya enda ngelangkar dalam ngemansangka sitak diri empu tu nadai deka bisi ngapa,” ku iya nyemetak.
“Pia mega nyema dirunding enggau logik, mayuh peranak di kandang menua pesisir udah nerima bantu dalam mayuh macham chara ke diberi nengah Opis Pengelantang Pendiau Komuniti sereta mega perintah nengeri Sarawak. Sida tu dalam individu ari baruh B40 lalu enda tau kena chukai,” ku iya.