Perintah Sarawak minta vaksin CanSino kena ngenyampatka proses vaksinasyen di menua ulu
KUCHING: Perintah Sarawak nengah Komiti Mutarka Penusah Ngenyit Nengeri Sarawak (JPBNS) minta dibekalka vaksin CanSino kena ngenyampatka agi proses vaksinasyen rayat ba kandang menua ulu.
Sapit Kepala Menteri Datuk Amar Douglas Uggah Embas madahka vaksin CanSino semina beguna siti dos tuchuk enggau minta abis kurang 600,000 ngagai 800,000 vaksin tu dibekalka ngagai Sarawak.
"Tu deka ngenyampatka proses vaksinasyen rayat kitai ba menua ulu ngambika kitai enda ibuh kekelut dua kali meri vaksin.
"Kitai bejalaika semua chara ti patut nyengkaum besedia meli vaksin ngambika tagit kitai deka meri vaksin ngagai rakyat lebuh manggai ujung bulan Ogos ulih dijapai," ku iya ba aum pengarang berita COVID-19 Sarawak ditu, kemari.
Uggah ti mega chairman JPBNS madahka, perambu Sarawak iya nya deka meri vaksin ngagai semua sida ke patut nerima.
Nya alai ku iya, iya meri penemuai basa ngagai Menteri Penyelaras Program Imunisasi COVID19 Kebangsaan Khairy Jamaluddin berandau sereta ngenataika perambu vaksinasyen Sarawak.
Perambu nya ku iya disambut manah Khairy tang ti pemadu beguna iya nya bekal vaksin.
"Khairy mega setuju ungkup kandang menua pesisir, tuchuk vaksin enda nitihka renggat dua tauka tiga. Kitai deka meri tuchuk vaksin ngagai semua ba siti timpuh.
"Laban enti kitai deka milih sapa ke patut ungkup kategori dua tauka tiga, nya deka ngenusahka lebih agi ba kandang menua ti jauh di menua pesisir," ku iya.
Dikena nentuka renggat kedua tuchuk vaksin bejalai enggau nadai penanggul ti deka berengkah dipejalaika 19 April tu, aum deka diatur begulai enggau semua residen bekaul enggau palan alai meri vaksin nya.
Asil aum nya, Uggah madah diri puas ati enggau penyikap semua ti bekaul nyengkaum bekaul enggau orang ti gawa maya nya.
Naka kemari penyampau orang ti patut ditucuh vaksin ba Sarawak iya nya pemadu mayuh ba menua tu.