Penegap politik pelasar pemansang sosio ekonomi
Nya kebuah politik mesti diseliahka ari pekara ke sengapa kelebih agi ba agenda diri empu enggau beratka raban diri aja
“
Ba timpuh ke sama mega majak negapka politik ti nyadi pelasar pemansang sosio ekonomi. Reti nya, kitai mesti fokus lalu besaup ngemansangka sosio ekonomi lalu nempa Sarawak nyadi nengeri maju ke bepenatai pemisi ke besai nyerumba taun 2030 enggau
” nangkanka nya.
Tun Pehin Sri Abdul Taib Mahmud
Tuai Megai Menua
KUCHING: Tuai Megai Menua,Tun Pehin Sri Abdul Taib Mahmud madah, politik mesti diseliahka ari pekara ke sengapa kelebih agi agenda diri empu enggau beratka raban diri, kena nentuka penegap politik di nengeri tu ulih ditanka.
Iya dalam jaku pesan meserimbai enggau Hari Raya Aidilfitri 2021 kemari madah, penegap politik mesti ditanka laban nya pelasar pemansang sosio ekonomi kelebih agi ba maya ke diatu rayat Sarawak mengkang betapi enggau pandemik COVID-19.
“Aku pechaya rayat Sarawak ti agi napi pengelekai COVID-19 deka terus nitihka atur ke diatu ngambi pulaika pengerai rayat enggau nengeri.
“Ba timpuh ke sama mega majak negapka politik ti nyadi pelasar pemansang sosio ekonomi. Reti nya, kitai mesti fokus lalu besaup ngemansangka sosio ekonomi lalu nempa Sarawak nyadi nengeri maju ke bepenatai pemisi ke besai nyerumba taun 2030 enggau nangkanka nya.
“Nya alai, politik kitai mesti diseliahka ari pekara ke sengapa kelebih agi ba agenda diri empu enggau beratka raban diri,” ku iya.
Ku Taib, ke pemadu beguna iya nya pemansang sosio ekonomi ti dipejalaika mesti bisi tuju kena nempa pemansang ti enda besiping sereta manah agi reti ngagai semua rayat.
Ku iya, rayat Sarawak deka napi Pengawa Bepilih Nengeri (PRN) ke-12 nitihka demokrasi ti dikemeranka diatu kenyau ari Sarawak merdeka nengah pengawa numbuhka Malaysia ba taun 1963.
“Baka ke ditemu kitai, perintah nengeri pengudahka bulih pengarap besai ari rayat ba PRN ke-11 (2016) udah bejalaika pelin pemansang timpuh panjai kena ngemujurka juluk ati nempa Sarawak nyadi nengeri ke pemadu maju sereta mujur nyerumba taun 2030.
“Sarawak benung bejalaika perambu pemansang timpuh panjai ti dikelala enggau nama Perambu Transformasyen Sosio-Ekonomi Sarawak (SETP) berengkah ari Atur Pemansang Malaysia Lumpar Ke-11 (RMK-11) sereta begunaka timpuh bejalaika nya pengelama 25 taun,” ku iya.
Kelimpah ari nya ku iya, Sarawak deka majak nambahka agi pemansu kasar dalam nengeri (KDNK) diatu ke sepenyampau RM121,814 enggau penatai pemisi perkapita RM44,990.
Ukai semina nya aja, perintah nengeri udah mujur ngerangka penyampau penyeranta ngagai kurang tiga peratus (3%).
“Aku pechaya sukung penuh rayat enggau pengawa dikereja perintah nengeri ngelama tu deka dipajakka ari baruh iring Kepala Menteri, Datuk Patinggi Abang Johari Tun Openg.
“Ke bendar iya deka nampung pengawa tu ungkup (Sarawak) ngambika ulih nyapai status nengeri maju,” ku iya.
Bekaul enggau pengerami ngintu Hari Raya Aidilfitri ke sekali tu, Taib madahka nya deka diintu dalam realiti baru ketegal pengelekai COVID19 di serata dunya.
“Ketegal pengelekai COVID-19 di serata dunya, kitai enggai enda pan natak pemindah kitai enggau chara kitai berandau enggau pangan diri. Taja pia kitai tau besampi ngagai ‘Allah’, ngambika ngintu Aidilfitri enggau ati ke lantang taja pan situasyen nya bebida.
“Nya alai, aku ngena peluang tu meri ‘Selamat Hari Raya Aidilfitri, maaf zahir dan batin’ ngagai semua rayat di nengeri tu kelebih agi raban Islam ke datai ari mayuh bengkah pupu bansa,” ku iya.