69 kandang menua ditetapka bisi penyakit rabies di Sarawak

KUCHING: Dua iti agi kandang menua baru ti ditetapka bisi baharu rabies di Sarawak ti ngujungka semua nya bisi 69 palan penyakit nyadi negeri tu nenyau ari bulan Julai 2017.

Opis Servis Veterinar Sarawak (JPVS) nengah penerang berita kemari,madahka Chairman Komiti Mutarka Penusah Ngenyit Nengeri (JPBN) Sarawak ke mega Sapit Kepala Menteri, Datuk Amar Douglas Uggah Embas netapka kandang menua baru nya di Pedaan ba pelilih menua Telang Usan, Miri enggau Pasar Tatau, Bintulu.

“Pekara nya ditukuka berindik ari kes positif peresa makmal ba dua iku ukui lelang ke ditangkap maya survelan aktif ba endur nya ti di luar 10 km radius ari kandang menua ti kala dituku sebedau tu,” pia ku penerang.

Berindik ari nya, penyampau palan penyakit rabies nitihka bagi menua di Sarawak snaka ke diatu kenyau ari bulan Julai 2017, iya bisi 22 di Serian, sama tujuh di Kuching enggau Miri, Sri Aman enggau Mukah (enam), Sarikei enggau Bintulu (lima), Samarahan (empat), Betong (tiga), Sibu (dua) lalu Kapit enggau Limbang (siti).

JPVS ngelalau pengempu ukai tauka mayau, nentuka jelu tupi sida divaksinasyen ninting taun lalu mesti jampat ngeripot ngagai JPVS, enti jelu nya bisi mandangka kelai dirampit rabies sereta betelefon ngagai lumur 082-628248 /082-610023 tauka 0162557267.

Kelai penyakit rabies ba jelu iya nya berubah ulah, agresif, ngetup lalu mulut bepupu, sensitif kena tegu, ai, utai ke tampak sereta lenyau bunyi nyawa, enggai makai tauka ngirup, lembau, entau angkat ti ngujungk iya mati. — Bernama