PKPD dipejalaika ba 11 iti endur, enam ari nya ba rumah panjai
KUCHING: Atur Nagang Pemindah Diteritka (PKPD) dipejalaika ba 11 iti endur di nengeri tu, lalu enam ari nya ba rumah panjai.
Komiti Mutarka Penusah Ngenyit Nengeri Sarawak (JPBNS) nengah siti penerang madahka rumah panjai nya Rh. Jangi Anak Jambai di KM1, Jalai Ulu Sebauh di Bintulu berengkah ari 10 nyentuk 23 Mei.
Beka diteritka PKP ba timpuh ke sama iya nya Rh. Musa Anak Asit enggau Rh. Gerena Anak Pi di Batu 17,
Jalai Bintulu-Miri di Bintulu, Rh. Jeli Anak Gaun di Sungai Muput, Tatau, Rh. Sulu Anak Jambai, Sg Senga, Pandan di Sebauh enggau Rh. Richard Sg Melaban di Sarikei dari 13 nyentuk 27 Mei.
“PKPD tu mega dipejalaika ba Kuarters Pekereja Samling Reforestation, Sg Mas, Samarakan enggau Blok LL2, Local Lodge, Samalaju Industrial Park di Bintulu ari 10 nyentuk 23 Mei 2021.
“Ba Blok Q, Flat Sg Plan di Bintulu diteritka PKPD berengkah ari 10 nyentuk 23 Mei 2021, Blok K PPR Bandaria Park mega di Bintulu ari 11 nyentuk 24 Mei 2021 enggau Kuarters Estet 1, Ladang Jendela Padu, Sebauh ari 11 nyentuk 24 Mei 2021,” ku iya.
JPBNSmega madahka PKPD ba enam buah rumah panjai iya nya Rh. Nyuka, Lubok Lemba di Sarikei, Rh. Janting, Lemujan di Pakan, Rh. Sam Anak Sumbang, Rh. Ajah Anak Umkar, Sg Serupai Baru di Tatau, Rh. Jawa Sungai Kerubong, Selalang enggau Rh. Robert, Ulu Paoh di Sarikei diketuka.
Bela diketuka PKPD iya nya SMK Melugu Sri Aman enggau Kuarters pekereja Foresom Plywood Sdn Bhd di Bintulu.
Timpuh PKPD ba tiga buah rumah panjai iya nya Rh. Chan Minggat, Sg Kesa enggau Rh. Rampai Sg Anyit Selanga lalu timpuh PKPD ba Rh. Ukan, Ng Engkamop di Julau dilanjarka berengkah ari 15 nyentuk 28 Mei 2021.
JPBNS mega madahka Pelilih Julau udah pulai baru ngagai status oren ari status Mirah pengudah ke ngerikodka semina 40 kes berampit dalam timpuh 14 hari ke udah.
Penyampau pelilih menua ke dalam status Mirah udah nurunka ngagai 27 pelilih menua lalu bisi siti dalam status Oren, iya nya Julau, 10 mengkang dalam status Kuning lalu dua pelilih menua iya nya Telang Usan enggau Kabong mengkang dalam status Gadung.