3,408 iku udah kena ‘Swab Test’ ba Pusat Sehenti COVID-19 MBKS
KUCHING: Bisi 3,408 iku udah kena ‘Swab Test’ ba Pusat Sehenti COVID-19 ba Balai Mensia Mayuh Majlis Bandaraya Kuching Selatan (MBKS) berengkah ari nya beroperasyen kena 3 Mei tu tadi.
Penerang berita ti dikeluarka Unit Komunikasyen Perintah Sarawak (UKAS) kemari madah, 2,407 agi swab test deka dipejalaika raban ke mindah kin kitu palan nya.
Palan nya mega ku iya, udah nerima 84 iku orang ke datai kia beratika gaya kelai enggau simptom COVID-19.
Berebak enggau nya, Sapit Kepala Menteri Datuk Amar Douglas Uggah Embas udah ngelawa palan nya enggau Palan Meresa COVID-19 ba Balai Mensia Mayuh MBKS kemari, ngabas gaya operasyen enggau aktiviti ninting hari dia bekaul enggau COVID19.
Uggah ke mega Chairman Komiti Mutarka Penusah Ngenyit Nengeri Sarawak (JPBNS) diberi ketuai komander palan nya penerang, iya nya Dr. Cheong Yaw Ling, Pemesai Perubat Bagi Menua Kuching, Dr. Eunice Mellisa Joseph enggau Tebangkar Perubat Penyakit Berampit Sepital Besai Sarawak (HUS) , Dr Chua Hock Hin.
Maya ke meri penerang nya, objektif enggau pengawa ti dipejalaika Pusat Sehenti COVID-19 nya mega bisi diterangka. Palan nya nyendiaka servis bejalaika swab test, beratika kelai enggau simptom COVID19, ngeluarka kompaun ungkup penyalah ngelanggar prosedur operasyen standard (SOP) sereta ngemansutka perintah enggau ngemaduka kuarantin.
Palan nya berengkah beoperasyen kena 3 Mei tu tadi mega megai tanggungpengawa nyaut semua tanya sentang isu bekaul penyakit COVID-19.
Palan nya dibuka ari pukul 9 pagi nyentuk 5 petang ari Hari Satu nyentuk Hari Lima, lalu ari pukul 8 pagi nyentuk 12 tengah hari maya ujung minggu enggau kemisi hari besai.
Sama bisi maya nya, Menteri Kaunsil Kandang Menua enggau Pengawa Berumah Dato Sri Dr Sim Kui Hian, Menteri Muda ba Opis Kepala Menteri (Hal Ehwal Islam & DBKU)Datuk Dr Haji Abdul Rahman Junaidi, Datuk Bandar MBKS Dato Wee Hong Seng enggau Direktor Unit Pengelikun Sereta Neritka Adat Nengeri (UKPN), Datu Dr Chai Khin Chung.
Nangkanka nya, Sekretari Perintah Nengeri, Datuk Amar Jaul Samion mega bisi ngelawa palan nya disempulang Sapit Sekretari Perintah Nengeri, Datu Ik Pahon Joyik.
Mensia mayuh tau betelefon lalu betanya ngagai palan nya nengah ‘hotline’ Pusat Sehenti COVID-19 ba lumur 082 - 597539, 082- 597790 tauka datai terus meresa gaya pengerai sida.