Anang nagang, meri penetap ngagai perintah nengeri meli vaksin kediri
Perintah besai enda patut nyekat pekara tu laban Sarawak bisi belanja kediri empu, lalu tu ungkup pemaik rayat: Masing
KUCHING: Sapit Kepala Menteri Tan Sri Datuk Amar Dr James Jemut Masing madahka perintah besai enda patut nagang tauka meri penetap ngagai perintah nengeri Sarawak ti deka meli vaksin kediri.
Pia mega, penguntung ari sukut ekonomi enda patut nyadika kebuah perintah besai ti enda ngemeratka pengerai rayat.
Berindik ari nya, iya udah mantaika buah penemu diri ngagai Opis Menteri Pengerai Malaysia (KKM) ngambika diperunding nyadi sekeda ari jalai kena mutarka enggau lengkas pengawa meri vaksin tu.
“Klinik tauka farmasi ti udah ditukuka di Malaysia mesti dikemendar kena meli sereta meri vaksin nya ngagai sida ti dekaka nya.
“Vaksin tu mesti ditetapka rega ungkup siti vaksin lalu diengkah mega ari baruh rintai rega barang ti dijaga.
“Kitai bisi belanja, tejuka aja kami ngena nya ungkup pemaik rayat kami ditu. ”
Tan Sri Datuk Amar Dr James Jemut Masing
Sapit Kepala Menteri
“Nya alai, sebarang ejensi ti enda ngasika atur nya deka ditinggang ukum! Atur mesti ka diteritka agi,” ku Masing kemari.
Iya mega ngansak ngambika perintah besai berunding meri pemendar ngambika meli vaksin ti udah dipadahka pengeluar nya terus ari menua luar.
Sarawak bisi belanja deka ngaga pekara bansa tu lalu tu nyadika juluk perintah nengeri ngambika rayat Sarawak tan ari igi penyakit COVID-19 nya.
“Sebedau tu, Amerika Syarikat (AS) udah meri vaksin ngagai lebih ari 200 juta rayat enggau lengkas lalu diatu pengawa ngena sengkabung idung enggau mulut nadai agi mesti dikena.
“Nyema Amerika Syarikat ti bisi lebih ari 200 juta iku lalu sida ulih ngaga baka nya, nadai kebuah lapa Sarawak enggau 2.8 juta rayat enda ulih ngaga bansa nya.
“Kitai bisi belanja, tejuka aja kami ngena nya ungkup pemaik rayat kami ditu,” ku iya nyemetak.