JKNS dipinta mansik silik Kluster Sentosa 2 di Kuching
KUCHING: Opis Pengerai Nengeri Sarawak (JKNS) dipinta mansik silik sereta mungkur semua Kluster Sentosa 2, Kuching sebuah fasiliti pengerai di Kota Sentosa, ditu.
Menteri Kaunsil Kandang Menua enggau Pengawa Berumah Dato Sri Dr Sim Kui Hian madah, kelimpah suah mansik epidemiologi, JKNS mesti mansik bala staf enggau orang ke nguan fasiliti pengerai ti disahka positif COVID-19, ti udah tembu betuchuk dos vaksin sida.
Dr Sim ke mega Penyanding
Penemu Komiti Mutarka Penusah Ngenyit Nengeri Sarawak (JPBNS) madah, semua staf ba fasiliti pengerai nya mega pengereja pengawa terabai menua mesti betuchuk dua dos vaksin COVID-19, sereta udah nembuka vaksinasyen sida ba fasa keterubah Program Imunisasyen COVID-19 Menua (PICK) renggat nengeri.
"Nama bansa vaksin ke dituchuk ba raban pengereja pengawa terabai menua ti dirampit tu, ni pengelama sida udah divaksin nyengkaum ngelala kontak semak sida," ku iya madah nengah Facebook iya malam ensanus.
Ku Dr Sim, JKNS mesti bekerejasama enggau Institut Pengerai enggau Perubat Komuniti (IHCM) UNIMAS ngaga pansik genom, laban nya bebida ari peresa swab RT-PCR.
"Pemutus peresa swab RT-PCR ditemu ba hari ke sama peresa nya dipejalaika, tang pansik genom begunaka timpuh ke lama, nya baru nemu pemuutus peresa nya, iya nya entara satu setengah nyentuk dua minggu.
"Dalam pekara tu,anang nyalahka sesapa tang bulih pemaik ari pansik tu ngambika kitai tau nyikap diri ari sukut bejalaika polisi enggau pengawa," ku iya.
Bekaul enggau Kluster Sentosa 2, Kuching, Dr Sim madahka tu kedua kali Sepital Sentosa ditukuka nyadi kluster ketegal pengelekai COVID-19 ba fasiliti nya, lalu ke sekali tu tagang pemindah diteritka ba bala staf enggau orang ke nguan palan nya pengelama14 hari.
Naka ensana, bisi 52 kes positif COVID-19 ditemu ba Kluster Sentosa 2, Kuching.
Berebak enggau nya, The Borneo Post dalam ripot berita kena Hari Tiga madahka Direktor Pengerai Nengeri Sarawak, Datuk Dr Mohamed Sapian Mohamed bisi mansutka jaku madahka varian Delta ditemu dalam kes COVID-19 di Sepital Sentosa sereta ngenukuka staf ba fasiliti pengerai nya udah beperesa swab.
"Aku ngarapka nadai kes varian Delta ditemu ba sepital tu. Nadai kes ke bekaul enggau (sebarang) varian (din).
Taja pia, staf udah beperesa swab, nya betul laban sida udah napi kes positif COVID-19," ku iya.
Dulu ari nya,Direktor IHMC UNIMAS Profesor Dr David Perera madahka sida bepanggai ba JKNS laban sepital swasta peribit nyendiaka sampel COVID19 ngambika diperesa ungkup varian baka Delta tauka Beta.
Dr Perera mega madah, naka ke diatu bedau temu sekalika sampel nya ari serata Sarawak tauka dipilih JKNS pia aja ari sepital peribit.