Bantu Bakul Pemakai PEMULIH di Tanjong Manis diagihka pengudah Aidiladha
SARIKEI: Kaban Parlimen (MP) P206 Tanjong Manis Ir. Yusuf Abdul Wahab madahka iya nya pengawa ngagihka bakul pemakai ngagai semua Ketuai Ruang Bilik (KIR) di sitak nya deka dipejalaika bererenggat.
Ku iya, pengawa ngagihka bantu bakul pemakai tu diperambu deka diatur pengudha ngintu Hari Raya Aidiladha.
“Program ngagihka bantu bakul pemakai tu setipak enggau Pakej Ngintu Pengelantang
Rayat enggau Mulaika Pemanah Ekonomi (PEMULIH) ti udah dipadahka Menteri Besai Tan Sri Muhyiddin Yasin bedau lama ti udah.
“Agih bantu tu diberi ngagai semua KIR bepelasarka rikod ari Opis Pelilih Menua di sitak Parlimen Tanjong Manis,” ku Ir. Yusuf.
Iya mega madah munyi nya pengudah ti ngatur program ngabas Palan Betuchuk Vaksin (PPV) di Sekula Primari (SK) Mupong, bedau lama ti udah.
Ku iya nandu, agih bantu tu begunaka agih belanja ti udah diberi ngagai tetiap Kaban Parlimen baka ke udah dipadahka Menteri Besai Tan Sri Muhyiddin Yasin dalam PEMULIH.
“Bantu ti diberi tu endang engkeman enggau maya nya lebuh ti mayuh ti udah kena empas ari pengelekai igi penyakit COVID-19.
“Berindik ari nya, kitai deka meri besai terima kasih ngagai Menteri Besai laban ti udah ngagihka belanja tu lalu deka dikena semua nya ungkup tuju ti udah dipadahka.
“Kitai mega minta ngagai semua rayat ngambika besabar laban bantu tu deka diagihka dalam timpuh ti enda lama agi,” ku Ir. Yusuf nambah.
Sama bisi dalam program tu iya nya Pemesai Opis Pelilih Menua Meradong, Badjuri Bidin enggau Kepala Pengajar SK Mupong Lingga Dagang.