MTAC ngarapka industri dagang temuai deka dibuka dalam taun tu
Laban Sarawak dipelabaka deka masuk ba fasa ketiga PPN ba ujung bulan Ogos tu
KUCHING: Opis Menteri Dagang Temuai, Seni enggau Main Asal (MTAC) arap bendar industri dagang temuai Sarawak deka dibuka ba suku keempat taun tu.
“
Kitai diatu ba fasa dua PPN enggau program vaksinasyen bejalai enggau manah enggau penyampau 71.4 peratus pemayuh mensia (populasi) orang besai tuai nerima dos keterubah
” vaksin COVID-19.
Datuk Abdul Karim Rahman Hamzah
Menteri MTAC
Menteri MTAC, Datuk Abdul Karim Rahman Hamzah madah, tu laban Sarawak dipelaba deka masuk fasa ketiga Pelin Mulaika Pemanah Menua (PPN) ba ujung bulan Ogos tu.
“Kitai diatu ba fasa dua PPN enggau program vaksinasyen bejalai enggau manah enggau penyampau 71.4 peratus pemayuh mensia (populasi) orang besai tuai nerima dos keterubah vaksin COVID-19.
“Lalu urung 31 peratus pemayuh mensia orang besai tuai udah tembu dua dos vaksin sereta ba ujung bulan tu tauka tengah bulan Ogos, kitai ulih nyapai tagit imuniti beraban 80 peratus peranak Sarawak divaksin,” ku iya.
Iya madah pekara nya lebuh dikerandau raban pengarang berita pengudah ngelawa Palan Meri Vaksin Industri (PPVIN) ba Gerempung Gerija Sarawak, Jalai Stampin ditu, Hari Lima apin lama.
Program vaksinasyen ba palan nya berengkah 15 Julai sereta tembu Hari Minggu (18 Julai) tu ti enggu tuju meri dos kedua vaksin COVID-19 ngagai 2,001 pengemeran industri dagang temuai.
Iya ngarap enggau pemansang ti positif nya, sektor dagang temuai nyengkaum pengawa dagang bukai ba nengeri tu ulih dipejalaika ba suku keempat taun tu.
“Industri dagang temuai iya nya siti ari industri ti balat tekeruga ketegal pandemik
COVID-19 sereta enggau program vaksinasyen tu dikearapka industri dagang temuai ulih berengkah enggau lengkas,” ku Abdul Karim.
Sarawak iya nya nengeri keterubah ba Malaysia ti nembuka program vaksinasyen ngagai bakih tauka pengemeran industri dagang temuai enggau pengawa dagang, ti diketuai MTAC enggau kerejasama Opis Menteri Dagang Temuai, Seni enggau Main Asal (MOTAC), Lembaga Pelancoangan Sarawak,
Persatuan Acara Perniagaan Sarawak, Opis Menteri Pengerai enggau Pusat Perubatan Timberland.
Ngenang pasal nagang pejalai entara nengeri, Kaban Kunsil Nengeri Asajaya tu nerangka, nya semina sementara.
“Penerit ba pengawa nyekat tu deka ditenduka lebuh kitai udah manggai vaksiansyen sepenyampau 80 peratus populasi,” ku iya.
Sama bisi datai, Sekretari Mendam MTAC Hii Chang Kee.