221 orang bumai di Kuala Rajang nerima bantu ari AFF
SARIKEI: Bisi 221 pengemeran industri mit betanam betupi ditu deka nerima bantu kereban ari Dana Fasilitasi Betanam Betupi (AFF) enda lama agi, ku Menteri Muda Pemansang Mengeri, Pengatur Tanah enggau Rampa Menua Datu Len Talif Salleh.
Ku iya madah, bantu tu deka dipejalaika bererenggat bepelasarka peminta ti udah diterima sereta dikemendar ari Opis Betanam Betupi.
Nitih ku iya, AFF ditumbuhka kena mantu ngangkatka penatai pemisi pengemeran industri mit betanam betupi nengah pengawa meri bantu kereban ngagai sida.
“Bisi RM1.5 juta AFF udah diagihka perintah Sarawak ungkup pengemeran industri mit di Kunsil Nengeri (DUN) N.41 Kuala Rajang.
“Belanja tu diagihka ngagai Zon Sarikei enggau Zon Tanjung Manis ke alai deka nerima sepenyampau RM750,000,” ku iya.
Iya madah munyi nya lebuh ti ditemu pengarang berita pengudah tembu nyuaka bantu AFF ba Opis Betanam Betupi Sarikei, lemai kemari.
Nitih ku Len, nyentukka diatu bisi 173 pengemeran industri mit betanam betupi ari DUN Kuala Rajang udah nerima bantu kereban nengah geran tu.
“Kitai ngarapka agih belanja tu deka meri empas ti positif ngagai pengawa perintah ngenegapka ekonomi rayat kelebih agi raban ti betanam betupi enggau orang dagang mit di nengeri tu.
“Nengah pengawa tu mega, kitai deka ngangkatka inovasyen, penemu, pengelandik sereta ulih besemekih lalu deka nyungkak ekonomi sida.
“Kitai ngarapka program tu ulih dipejalaika enggau lengkas lalu pengudah nya ulih ngatur belanja ke bisi enggau manah kena nentuka sida diberi bantu ti patut,” ku Len nerang.
Sama bisi ba pengerami tu iya nya Pemesai Opis Betanam Betupi Pelilih Menua Sarikei Rainy Yaman enggau Penulung Pemesai Opis Betanam Betupi Bagi Menua Sarikei Ridzuan Abdullah.