Nyau deka 100 peratus pedagang, pekereja kedai kupi di Sibu udah dituchuk vaksin COVID-19
SIBU: Pengatur Komiti Mutarka Penusah Ngenyit Bagi Menua (JPBB) Sibu Dr Annuar Rapa’ee puas ati lebuh nyauka 100 peratus pedagang enggau pekereja si kandang mengeri Sibu udah nerima pemadu nadai dos keterubah vaksin COVID-19.
Iya madah munyi nya pengudah ngatur aktiviti matau pengempu premis dagang enggau pekereja sida di mengeri Sibu, kemari.
Program tu udah disereta Chairman Opis Kaunsil Mengeri Sibu (SMC) Clarence Ting enggau bala kunsilor SMC.
“Sehari tu (kemari) aku begulai enggau chairman SMC sereta baka kunsilor udah matau ngagai tetiap premis dagang deka nanya komuniti sereta pekereja di kedai kupi sekalika sida udah betuchuk vaksin tauka bedau.
“Laban kitai endang nemu iya nya SOP (prosedur operasyen standard) diatu madahka semina pengempu premis pemakai nyengkaum pekereja ti udah betuchuk pemadu nadai dos keterubah vaksin COVID-19 ti dikemendarka bekereja di kedai ke deka bejalaika operasyen chara ‘dine-in’.
“Pengudah pengawa matau tu, aku udah nemu nyauka 100 peratus pengempu premis dagang ditu udah betuchuk vaksin pemadu nadai siti dos,” ku Dr Annuar nengah video ‘live’ lebuh aktiviti matau nya di Facebook rasmi iya kemari.
Nengah pengawa matau tu, Dr Annuar ke mega Menteri Muda Kandang Menua mega nanya ngagai penguna ti bisi duduk ba pak kupi bekaul enggau vaksinasyen sida.
Nyauka semua pengempu kedai kupi enggau pekereja sereta penguna ti ditanya madahka udah betuchuk vaksin seraya mantaika setipikit vaksinasyen digital nyadika kelai udah dituchuk vaksin.
“Aku chukup puas ati lebuh kitai bejalaika pengawa matau di mengeri Sibu sehari tu (kemari).
“Semua ti ditanya madahka udah dituchuk vaksin pemadu nadai siti dos. Tu iya nya siti pengawa kitai kena nentuka peranak kitai nyauka 100 peratus betuchuk vaksin,” ku iya.
Beserimbai enggau nya, Sapit Chairman Komiti Mendam Pengerai Mensia Mayuh, Rampa Menua enggau Servis Mengeri SMC, Kunsilor Jenny Ting madah, raban SMC deka ngemansutka setipikit ngesahka pengempu kedai kupi ngambika dilekat ba dinding nyadika kelai semua pekereja kedai nya udah dituchuk vaksin.
Beserimbai enggau nya, ku iya, raban komiti mega benung chakah nyadung pom kena ngumpul penerang bekaul vaksinasyen ngagai pengempu kedai enggau pekereja sida.
“Ungkup ti udah dituchuk vaksin, sida mesti ngisi pom enggau nama, lumur tingki sereta haribulan dos keterubah lalu pengudah nya sida patut nyendiaka setipikit vaksinasyen ngambika ulih disahka.
“Nyema semua penerang diberi nya chukup, kitai deka ngemansutka setipikit ngesah vaksinasyen ngagai kedai kupi tu. Nya alai, semua penguna likun ulih ‘dinein’,” ku iya.