NSJA neruska ‘Program Prihatin Kasih’ ungkup raban terabai menua
MIRI: ‘Program Prihatin Kasih’, aktiviti tanggungpengawa rama korporat (CSR) Gerempung Pengarang Berita Utara Sarawak (NSJA) ungkup raban terabai menua diteruska enggau meri bantu pengasih nya ngagai empat operasyen ngempang jalai alun (SJR) enggau dua Palan Nuchuk Vaksin (PPV) ditu, bedau lama ti udah.
Presiden NSJA Andy Jong madah, empat SJR ti dilawa iya nya di Jalai Bakam Miri ti ba mua Balai Polis Tanjong Lobang, Jalai Miri-Bintulu di mua Balai Polis Trafik Miri, di simpang Sungai Rait enggau Jalai Lambir di simpang Kampung Tunku Abdul Rahman.
“Sarawak udah ba Fasa 2 Pelin Mulaika Pemanah Menua (PPN) enggau dua
SJR ti agi bejalaika operasyen iya nya simpang Sungai Rait enggau Jalai Lambir.
“Barang pemeri ngagai raban di SJR iya nya ari orang ti meri ke enggai madahka nama diri tu iya nya biskut, ai irup enggau sengkabung idung enggau mulut ke diagihka ngagai empat SJR,” ku iya nengah penerang media ditu, kemari.
Ku Andu madah, pengawa ngagihka pemeri di dua PPV mega iya nya di Dewan Eastwood Valley enggau Dewan Dato’ Lee Teck Fook, Riam Road Secondary School.
“Barang pemeri ari Indocafe iya nya bungkus 3 dalam 1, ai irup enggau ruti ti diagihka ba dua PPV tu,” ku iya.
Beserimbai enggaun nya, Andy madahka program tu kena ngenang pengeransing raban terabai menua ti udah bebendar deka mutuska rentayan kena rampit sereta nagang pengelekai COVID19.
“Aktiviti CSR ngagai raban terabai menua tu iya nya program ti keterubah diatur NSJA pengudah pandemik COVID19 nyadi di menua kitai kenyau ari Mac taun nyin kemari.
“NSJA endang ngenang pemendar raban terabai menua enggau program tu ke lalu ulih ngemeranka ulah ti ngenang pengawa raban servis pengerai enggau pengelikun mensia mayuh,” ku iya nerang.
Program nya mega udah disereta Sekretari NSJA Michelle Choo, Mandal Tukang Wang NSJA Esther Ching enggau Komiti Alan Yong sereta Liew Li Mui.