PDRM udah nangkap orang ti disangka dalam kes munuh Bill Kayong
KUCHING: Parti Keadilan Rakyat (PKR) Sarawak meri puji ngagai pemujur Polis Diraja Malaysia (PDRM) nangkap orang ke disangka (suspek) dalam kes munuh Sekretari PKR Miri Bill Kayong.
Tuai Pemadah PKR Sarawak, Abun Sui Anyit madah sida iya meri penerang nya bepelasarka pengerembai positif kes tu iya nya orang ke disangka Kong Sien Ming ulih ditangkap baka diripot dalam media.
“Nya alai, KEADILAN Sarawak deka meri puji ngagai polisi laban ti amat chakah bejalaika nama ti patut nyentuk orang ke disangka nya ditangkap.
“KEADILAN Sarawak ngarap orang ke disangka tu, Kong Sien Ming ti bisi kaul enggau kes munuh tu ulih dipansik sereta dipechara awakka ‘keadilan’ ulih ditegika lebih agi ngagai niang Bill Kayong enggau sida sebilik.
“KEADILAN Sarawak ngarap sida raban ti nawa ulih nyendiaka enggau ngaga pengawa enggau pengabis manah awakka tu ulih ditegika enggau manah,” ku iya nengah sebengkah penerang berita.
Berebak enggau tu Abun ngingatka dikena nentuka atur mansik kes dipejalaika enggau lanchar, mensia mayuh dikearap enda ngaga sebarang spekulasyen tauka cherita.
“Laban kes tu agi dalam pansik polis enggau dalam proses, KEADILAN Sarawak ngarap mensia mayuh enda ngaga sebarang spekulasyen ke ulih ngeruga pansik polis enggau pengawa ngatur dawa,” ku iya.
Bepelasarka berita ensanus, siku orang ke disangka ti digiga bekaul enggau kes munuh Sekretari PKR Bill Kayong lima taun ke udah mujur ditangkap polis sereta dibai pulai ke Miri ensanus.
Kong Sien Ming dibai pulai ari Kuala Lumpur ngena pesawat unit udara PDRM sereta datai ba Padang Bilun Miri urung pukul 2 lemai.
Orang ke disangka udah nya disempulang sereta dibai ngagai Balai Polis Pusat Miri ulih seraban anggota ari Jabatan Siasatan Jenayah (JSJ) Indu Opis Polis Pelilih Menua (IPD) Miri pengudah datai ba Padang Bilun Miri.
Pesuruhjaya Polis Sarawak, Datuk Aidi Ismail lebuh ditanya udah ngesahkan pengawa nangkap orang ke disangka nya.