Sarawak mutuska deka meli CanSino, dipelabaka datai ujung Julai
Vaksin dos tunggal tu beguna kena ngemujurka program vaksinasyen ungkup peranak di menua pesisir: Abang Johari
MIRI: Perintah nengeri udah mutuska deka meli vaksin dos sekali, CanSino lalu ngarapka nya deka datai ba ujung bulan Julai tu kena ngemujurka program vaksinasyen ungkup peranak di kandang menua pesisir Sarawak.
Kepala Menteri Datuk Patinggi Abang Johari Tun Openg madah, vaksin dos sekali tu deka ngemudahka pengawa nuchuk vaksin ngagai peranak di kandang menua pesisir ti napi pemas deka ke Palan Betuchuk Vaksin (PPV) di kandang endur ke udah ditetapka laban penanggul ungkus sereta mega jauh deka dilawa.
“Aku dipadahka ari pemesai perubat, mayuh peranak di menua pesisir ti udah betuchuk dos keterubah sida, enggai agi mansang deka betuchuk dos kedua.
“Berindik ari nya kitai meri sida (vaksin) CanSino, taja tu dos sekali, sida tetap bisi tejaga (imunisasi) enggau chukup. Tu mega meri pengelantang ngagai kitai enggau peranak nya empu,”
“Kitai melabaka ujung bulan Julai tu nyangka kitai deka bulih nya. Tu udah tentu deka ulih ngemuntangka peranak di menua pesisir laban sida enda ibuh mansang (ke PPV) deka betuchuk dos kedua. ”
Datuk Patinggi Abang Johari Tun Openg Kepala Menteri
ku iya maya aum media ti diatur ba PPV Dewan Curtin di Universiti Curtin (Kampus Sarawak) di Senadin kilah ensanus.
“Vaksin dos tunggal tu bisi dua pilih iya nya CanSino enggau Johnson&Johnson. Tang perintah nengeri udah ngaga pemutus deka meli CanSino.
“Kitai melabaka ujung bulan Julai tu nyangka kitai deka bulih nya. Tu udah tentu deka ulih ngemuntangka peranak di menua pesisir laban sida enda ibuh mansang (ke PPV) deka betuchuk dos kedua,” ku iya nambah.
Bulan nyin kemari, perintah Sarawak udah minta 650,000 dos vaksin tu ari perintah besai, khas ungkup rayat di kandang menua pesisir aja.
Bekaul penemuai iya ke Miri lalu meda kediri tikas pemansang program vaksinasyen ba empat PPV ditu, Abang Johari madahka diri puas ati enggau pemujur sereta kerejasama ti diberi peranak di Miri, kelimpah sektor peribit enggau raban volunteer ti mayuh mantu di sektor perintah ti bekaul.
“Aku dipadahka di Miri, ungkup tuchuk dos keterubah bisi 238,772 dos udah dituchuk lalu tu iya nya 72.5 peratus, sereta dos kedua iya nya 114,634 tauka 35 peratus.
“Pemadu nadai kita (Komiti Mutarka Penusah Ngenyit Bagi Menua (JPBB) Miri) udah nyapai juluk 70 peratus.
“Aku pechaya, Miri deka nyapai peratus ti tinggi sereta ngelui juluk laban aku dipadahka agi mayuh ti udah ngerejista deka betuchuk dos sida,” ku iya nambah.
Beserimbai enggau nya, Abang Johari mega pechaya Sarawak nyapai 80 peratus rayat betuchuk baksin datai ba ujung Ogos, bepelasarka pemujur nyentukka diatu iya nya bisi 1.5 juta iku udah betuchuk dos keterubah sida di nengeri tu.
Bekaul penanggul sekut enggau kurang katil di Unit Rawatan Rapi (ICU) nyengkaum di Sepital Miri, iya madahka penanggul tu majak kurang laban kes kena rampit COVID-19 ti majak nurun di Miri.
Pia mega, program penemuai Abang Johari ke Long Lama patut nya pagi ensanus tang dikinsil laban penusah ampuh bah.
Sama bisi datai nyempulang Abang Johari iya nya Sapit Kepala Menteri Datuk Amar Awang Tengah Ali Hasan ti mega Menteri Pemansang Mengeri enggau Pengeraja Asal Kedua enggau Menteri Dagang Antarabansa enggau Industri, Terminal Industri sereta Pemansang Orang Dagang, Menteri Kandang Menua enggau Pengawa Berumah Dato Sri Dr Sim Kui Hian, Menteri Perengka Pengangkut Datuk Lee Kim Shin, ti mega Menteri ti Megai Tanggungpengawa JPBB Miri, Sekretari Perintah Nengeri Sarawak Datuk Amar Jaul Samion sereta Direktor Opis Pengerai Nengeri Sarawak Datuk Dr Mohamed Sapian Mohamed.