KM muji sereta temegah ati enggau JPBB Miri
MIRI: Kepala Menteri (KM) Datuk Patinggi Abang Johari Tun Openg ti udah ngelawa ke empat Palan Betuchuk Vaksin (PPV) ditu, madahka diri puas sereta temegah ati enggau pengeransing Komiti Mutarka Penusah Ngenyit Bagi Menua (JPBB) Miri dalam ngemujurka program vaksinasyen di bagi menua tu.
Kerejasama rat tu, ku iya, udah nentuka Miri ulih nyapai juluk nuchuk vaksin ngagai 238,772 ungkup dos keterubah, iya nya 72.5 peratus ari pemayuh rayat di Miri, pia mega dos kedua iya nya 114,634 tauka 35 peratus.
Dalam penemuai rasmi iya kitu kemari, Abang Johari udah meda kediri empu gaya di empat palan tu iya nya PPV Sepital Miri di Dewan Dato Lee Teck Fook enggau Sekula Sekondari Riam Road (RRSS).
Tu lalu ditangkan enggau penemuai iya ke PPV Dewan Eastwood Valley di Eastwood Valley Golf & Country Club, sebedau ke PPV Industri Minyak enggau Gis di Opis PETRONAS Sdn Bhd di Lutong muakka lemai.
Kepala Menteri enggau bala bukai nembuka program di Miri enggau penemuai iya ke PPV Dewan Curtin di Universiti Curitn Kampus Malaysia ke alai iya mega udah diberi penerang ari JPBB Miri sebedau mulaika diri.
Sama bisi nyempulang Abang Johari iya nya Sapit Kepala Menteri ke mega Menteri Pemansang Mengeri enggau Pengeraja Asal Kedua sereta Menteri Dagang Antarabansa enggau Industri, Terminal Industri sereta Pemansang Orang Dagang Datuk Amar Awang Tengah Ali Hasan, Menteri Kandang Menua enggau Pengawa Berumah Dato Sri Profesor Dr. Sim Kui Hian, Menteri Perengka Pengangkut ti mega Menteri ti Megai Tanggungpengawa JPBB Miri Datuk Lee Kim Shin, Sekretari Perintah Nengeri Sarawak Datuk Amar Jaul Samion sereta Direktor Opis Pengerai Nengeri Sarawak Dato’ Dr Mohamed Sapian Mohamed.