KWKPK deka ngatur enggau KPM bekaul nembiak ti benung minta status peranak menua dikemendarka besekula
KUCHING: Opis Menteri Pengintu Pengelantang Pendiau,Pengelatang Pendiau Raban Bansa, Orang Indu, Ruang Bilik enggau Pemansang Nembiak Mit (KWKPK) deka nulis surat rasmi ngagai Opis Menteri Pelajar Malaysia (KPM) minta pemendar nembiak bala nembiak ti dalam proses minta status peranak menua dikemendarka besekula.
Menteri iya, Dato Sri Fatimah Abdullah madahka inisiatif tu dikena nentuka bala nembiak tu enda tinggal ari pelajar.
"Dalam timpuh proses minta (status peranak menua) tu kitai minta KPM ngambika ulih ngemendarka nembiak tu ulih terus belajar tauka dikemendarka besekula.
"Bisi penerang nunjukka nembiak tu benung dalam proses minta baka resit ti bisi lumur rujukan enggau nyema sekula nya begunaka penerang silik kitai mega ulih mantu enggau kerejasama Opis Menteri Dalam Menua (KDN) iya nya endang amat nembiak ti dalam proses minta status peranak menua nyadi peranak menua Malaysia.
"Kitai meda tu iya nya siti chara kena nentuka nembiak tu enda tinggal ari pelajar," ku Fatimah seraya madah nya entara pekara dikaum dalam aum ke-2 2021 Komiti Khas Peranak Menua ari baruh Perkara 15A Konstitusyen Perintah Besai Renggat Sarawak (JKKSK Sarawak) ti bechairman iya enggau Sapit Menteri KDN 1 Datuk Seri Ismail Mohamed Said.
Iya madahka pekara tu ba aum pengarang berita pengudah Pengrami Nyuaka Surat Pemutus Peminta Peranak Menua ari baruh Perkara 15A Konstitusyen Perintah Besai ti diatur ba Bangunan Sultan Iskandar ditu, kemari.
Nitih ku Fatimah ba aum nya mega berandau tauka bejuraika sepenyampau 145 kes tauka peminta status peranak menua ari baruh Perkara 15 A Konstitusyen Perintah Besai ari Sarawak.
Ku iya tanggungpengawa komiti tu iya nya meda enggau silik tiap peminta enggau nadai prejudis tauka dipejalaika enggau profesional sebedau komiti mai peminta ngagai KDN ti bisi kuasa ngemendarka peminta status peranak menua.
"Komiti tu deka nentuka proses peminta ulih diputar tauka dilengkaska agi ari segi bulih saut sekalika dilulus tauka enda.
"Sehari tu mega ba pengerami ke diatur ngena chara mit, bisi lapan (8) iku ke diau ba kandang menua Kuching nerima surat kelulusan peminta sereta sida ke di luar Kuching surat tu deka dianjung ngagai sida," ku iya.
Berebak enggau tu Fatimah madah entara kebuah status peranak menua bedau ditentuka tauka ukai peranak menua iya nya ketegal pengawa jadi laki bini enda nitihka atur ti patut, bisi sekeda beranak sebedau jadi laki bini, ngambi anak iru enda ngena atur ke betul enggau tegal ke bukai.
Lebuh ti ngenang pasal komiti khas tu, iya madahka JKKSK Sarawak ditumbuhka ba taun 2016 tang diketu enda lama ketegal ti betukar perintah sebedau dikemendarka baru ba taun 2020.
Sama bisi ba aum pengarang berita nya kemari Menteri Muda Orang Indu, Ruang Bilik enggau Pemansang Nembiak Mit Datuk Rosey Yunus sereta sida ke bukai.