Anang dulu ari YDP Agong, PRN-12 Sarawak bedau diatur
SPR bedau ngayanka sebarang chara tauka garis lalau ungkup PRN-12, nganti YDP Agong ngetuka EO di nengeri tu
“Bedau agi, anang dulu ari Yang diPertuan Agong. Pengawa ngerera DUN, netap sereta ngetuka darurat, tu semua ” nya kuasa Yang di-Pertuan Agong.
Datuk Seri Ismail Sabri Yaakob Menteri Besai
KUCHING: Menteri Besai Datuk Seri Ismail Sabri Yaakob madahka Raban Pengawa Bepilih (SPR) bedau ngayanka sebarang chara tauka garis lalau ungkup Pengawa Bepilih Nengeri Sarawak Ke-12 (PRN-12).
Iya madahka pengawa ngerera Kunsil Nengeri (DUN) Sarawak ti kena nentuka PRN-12 diatur iya nya pengudah Yang di-Pertuan Agong ngenukuka Perintah Darurat (EO) di nengeri tu abis.
“Bedau agi, anang dulu ari Yang di-Pertuan Agong. Pengawa ngerera DUN, netap sereta ngetuka darurat, tu semua nya kuasa Yang di-Pertuan Agong.
“Nya alai, anang mih kitai ngelui ari kuasa Yang diPertuan Agong. Kitai nganti aja,” ku iya maya aum media pengudah datai ngelawa taba Projek Sepital Petra Jaya ditu, kemari.
Sama bisi datai iya nya Kepala menteri Datuk Patinggi Abang Johari Tun Openg, Sapit Kepala Menteri Datuk Amar Awang Tengah Ali Hassan, Menteri Kereja Raya Datuk Seri Fadillah Yusof enggau Menteri Kaunsil Kandang Menua enggau Pengawa Berumah Dati Sri Dr Sim Kui Hian.
Iya madah munyi nya laban ti nyaut tanya raban pengarang berita sekalika SPR bisi ngayanka chara ngatur PRN-12 Sarawak nyema tu diatur enda lama agi.
Perintah Darurat diterika di Sarawak kena nagang pengelekai COVID-19 pengudah tu diketuka di selampur menua maya bulan Ogos tu tadi berindik ari kes COVID-19 ngerikodka penambah ti majak nyadi lalu ngirauka ati.
Berindik ari nya, pengawa bepilih enda ulih diatur taja timpuh DUN udah abis kena bulan Jun nyin kemari. Perintah Darurat di Sarawak deka tembu kena 2 Februari 2022.
Maya PRN-11, ba taun 2016, Barisan Nasional (BN) ari baruh pegai ex-Kepala Menteri Niang Pehin Seri Adenan Satem udah menang besai lalu nerima pemendar (mandat) nyadi parti ti mega perintah di Sarawak.
Taja pia, ba taun 2018, BN nengeri maya nya ti nyengkaum Parti Pesaka Bumiputera Bersatu (PBB), Parti Rakyat Sarawak (PRS), Parti Demokratik Progresif (PDP) enggau Parti Sa’Ati Rayat Sarawak (SUPP) udah pansut ari BN lalu numbuhka Gabungan Parti Sarawak.
Abang Johari udah dichiri nyadi Kepala Menteri Sarawak keenam pengudah Adenan midang kena 11 Januari 2017.
Kunsil Nengeri (DUN) Sarawak ngembuan 82 kerusi.