Sepital Marudi nerima sebuah agi injin hemodialisis kemari
MARUDI: Sepital Marudi nerima penambah sebuah injin hemodialisis ke baru ti lalu nambahka servis ngagai pesakit tungkul sengayuh ba sitak nya.
Menteri Pengelantang Pendiau Komuniti, Orang Indu, Ruang Bilik enggau Pemansang Nembiak Mit Dato Sri Fatimah Abdullah madah, bisi 75 iku udah berubat kenyau ari Unit Hemodialisis Marudi nya beoperasyen kena bulan Mac 2005.
Ku iya, naka 21 Oktober tu, bisi 28 pesakit iku agi datai berubat lalu ke bukai nya udah nadai,betukar alai berubat tauka udah beputung nerima organ.
“Injin tu ulih nambahka penyampau injin ke udah bisi diatu berindik ari penambah penyampau pesakit ti datai berubat ba Sepital Marudi.
“Kelimpah ari nya, injin tu tau kena nganti injin hemodialisis ke udah lama, kelimpah kapasiti orang ti bekenaka injin tu mayuh,” ku iya lebuh ke bejaku ba pengawa nyuaka injin hemodialisis di Sepital Marudi kemari.
Sama bisi datai nerima injin ke diberi nya, Sapit Direktor Sepital Marudi Dr Khairun Nasirin Sallamun.
Naka ke diatu, sepital Marudi bisi lima injin kes negatif enggau sebuah agi injin u ngkup kes Hepatitis B Positif.
Naka 18 Oktober taun tu, bisi 34 iku datai berubat ba Unit Hemodialisis Marudi enti dibandingka enggau 26 iku ba taun 2020.
Ari 34 kes, kes negatif ngerikod 28 iku lalu Hepatitis B positif bisi enam iku.
Ku Fatimah, pesakit ti datai berubat iya nya raban bansa asal ari pelilih Marudi enggau orang luar.
Sida ukai ari kandang menua ke besemak ti nyuwa alai diau,diau ba kaban belayan tauka diau ba rumah alai bemalam.
Sama bisi nerima bantu sebuah injin nya Sepital Dalat, Sepital Saratok, Betong enggau Sepital Sarikei, lalu Palan Tungkul Ati Sarawak nerima dua iti injin.
Sebuah injin nya ku iya, berega RM41,500 lalu semua penyampau ke dibelanja kena meli enam injin nya, RM249,000.
Ku iya baru, bisi 124 iku pesakit di nengeri tu nerima BKPBP kenyau ari 1 Januari nyentuk 18 Oktober ti ngena ungkus belanja RM2,462,718.
Ungkup belanja BKPBP di Sarawak ba taun 2020 iya nya RM4,673,917 lalu ba taun 2021 (RM6,023,917) sereta RM3.2 juta ungkup taun 2022.
BKPBP nya inisiatif Perintah Nengeri kena mantu ngelempungka tating belanja pesakit di nengeri tu ti berubat penyakit tungkul sengayuh.