Perintah Sarawak nadai meri subsidi tambang bot ekspres
Naka ke diatu, perintah Sarawak nadai meri sebarang subsidi tambang bot ekspres sekalika ngagai orang tambang tauka pengemeran bot ekspres.
Sapit Menteri Perengka Pengangkut II, Datuk Henry Harry Jinep madahka opis menteri iya nengah Opis Sungai Sarawak (LSS) udah ngatur randau kena 29 April 2022 begulai enggau pengemeran bot ekspres, ambika nemu penanggul ke ditapi sida.
Bepelasarka randau nya ku iya, isu besai ti dikenataika bekaul enggau ungkus operasyen ti nambah enggau ngena ‘skid tank’, sereta sida minta perintah mutarka penanggul tu.
“Nya alai, pengemeran bot ekspres udah dipinta ngenataika peminta minta minyak diesel besubsidi enggau penendu ngena skid tank ngagai Opis Menteri Dalam Negeri enggau Pekara Penguna (KPDNHEP).
“Bantu diesel besubsidi tu deka mantu ngurangka ungkus operasyen bot ekspres. Ari pengawa ngurangka ungkus operasyen tu mega deka meri penguntung ngagai orang tambang.
“Opis Menteri Perengka Pengangkut nengah LSS sereta kerejasama KPDNHEP, Opis Tasik Wilayah Sarawak enggau Opis Kastam DiRaja Malaysia, deka mantu pengemeran bot ekspres bekaul enggau peminta diesel besubsidi enggau penendu skid tank,” ku iya maya sesi tanya saut ba Hari Keempat Aum Kedua Penggal Keterubah Kunsil Negeri Sarawak Ke-19, ti diatur ba Kompleks DUN Sarawak ditu, kemari.
Henry nerangka pekara tu lebuh ti nyaut tanya Paulus Palu Gumbang (GPS-Batu Danau), ti nanya sekalika perintah bisi perambu meri subsidi kena ngelempungka belanja rayat ke diau di Limbang enggau Lawas ke ngena bot ekspres, berindik ari pemutus ‘Perintah Menua Brunei Darussalam’ ti nangguhka atur muka garis antara menua, ti deka ngatur pejalai entara kededua pelilih menua nya.
Dulu ari nya, Henry madahka atur muka garis antara menua Menua Brunei Darussalam ditangguh nyentuk 31 Mei 2022 nitihka penerang berita ti dikeluarka Opis Menteri Besai, Menua Brunei Darussalam kena 22 April 2022.
Henry madah, atur nya udah meri empas ngagai mobiliti peranak entara Pelilih Menua Limbang enggau Pelilih Menua Lawas nengah jalai darat ti patut meraka Pelilih Menua Temburong di Menua Brunei Darussalam.
“Nya alai, perengka pengangkut ai nya siti ari perengka pengangkut ti nyambungka kededua Pelilih Menua Limbang enggau Pelilih Menua Lawas, kelimpah ari perengka pengangkut langit ti disediaka Maswing.
“Diatu, servis perengka pengangkut ai ba Sektor Limbang/Lawas/Limbang disediaka Express Ratu Pertama No.2 enggau Express Pertama Limbang.
“Penyampau tambang bot ekspres siti pejalai mansang tauka pulai aja ti ditetapka ungkup Sektor Limbang/Lawas iya nya RM35 ungkup orang tambang besai tuai enggau RM20 ungkup orang tambang nembiak mit,” ku iya.
KUCHING: Kunsil Negeri (DUN) Sarawak kemari ngemendarka Rang Undang-Undang (RUU) Bekal Tambah (2022), 2022 kena minta belanja tambah sepenyampau RM60,064,358.
RUU ti dibantaika Sapit Premier Sarawak ti mega Menteri Wang enggau Ekonomi Baru Kedua Datuk Amar Douglas Uggah tu nadai dipejuraika.
“Belanja tambah tu kena napi peminta geran operasyen tambah 23 Opis Bekuasa Kandang Menua (PBT) baka, diskaun 25 peratus ba chukai pintu rumah ke sepenyampau lebih RM400 ninting taun, chukai komersial, industri enggau tuju khas sereta tanah puang ari timpuh Januari ngagai Jun 2022, sepenyampau RM18,182,344.
“Diskaun 30 ngagai 100 peratus ke atas chukai pintu rumah enggau ke sepenyampau RM400 ninting taun enggau ke baruh ba taun 2020, ke sepenyampau RM23,554,945.
“Diskaun 30 ngagai 100 peratus chukai pintu rumah enggau penyampau RM400 ninting taun enggau ke baruh ari timpuh Januari ngagai Jun 2022, sepenyampau RM12,176,798,” ku iya.
Uggah mantaika RUU Perbekalan Tambahan (2022), 2022 tu ba Hari Keempat Aum Kedua Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu, kemari.
Bejaku baru, iya madahka belanja tambah nya mega dikena napi peminta geran operasyen baka diseliahka mayar (waiver) permit dagang enggau lisin ke diempu PBT ba taun 2022, ke sepenyampau
“Belanja tambah tu kena napi peminta geran operasyen tambah 23 Opis Bekuasa Kandang Menua (PBT) baka, diskaun 25 peratus ba chukai pintu rumah ke sepenyampau lebih RM400 ninting taun, chukai komersial, industri enggau tuju khas sereta tanah puang ari timpuh Januari ngagai Jun 2022, ” sepenyampau RM18,182,344.
Datuk Amar Douglas Uggah Sapit Premier Sarawak
RM5,735,532.
Nambah nya, diseliahka (waiver) mayar lisin hotel enggau rumah alai bemalam ungkup taun 2022, ke sepenyampau RM213,659, enggau diskaun 50 peratus ungkup suwa terminal bas ke diempu PBT ba taun 2022, ti sepenyampau RM201,080, ku iya.
Kelimpah ari nya, iya madahka belanja tambah mega dikena bejalaika beberapa sub-aktiviti.
“Nya alai, ungkup belanja tambah ti diguna iya nya RM100,000,000 kena melanja mayuh bengkah Projek Rakyat ti benung dipejalaika di selampur negeri,” ku iya.