Lima peminta perintah negeri bekaul enggau MA63 agi dikerandauka: Hasidah
Sapit Menteri ba Opis Premier Sarawak (UndangUndang, MA63 enggau Kaul Negeri - Perintah Besai), Datuk Sharifah Hasidah Sayeed Aman Ghazali madahka perambu nyadi kaban pengari Perintah Sarawak dalam Opis Direktor LHDN entara lima ari peminta perintah negeri bekaul enggau Sempekat Malaysia 1963 (MA63) agi dikerandau.
Iya madah, ti agi dikerandau mega nyengkaum Isu administrasyen opis akim di Sabah enggau Sarawak, perambu ngaku Opis Kerja Raya (JKR) Sarawak, Opis Parit enggau Entali Ai Sarawak (DID) enggau Opis Bekal Ai Menua Pesisir Sarawak (JBALB), nyadi Opis Teknik ari baruh ‘Arahan Perbendaharaan 182’.
Nambah nya, perambu nambahka penyampau kaban Dewan Rayat ari Sabah enggau Sarawak ba Parlimen enggau berandauka pasal formula meresa Pemeri Khas ari baruh Perkara 112D Konstitusyen Perintah Besai mega agi dikerandauka, ku iya.
“Ke penerang Kaban Yang Berhormat Satok, Perintah Sarawak deka majakka randau sereta berunding enggau Perintah Besai kena nentuka peminta nya ulih dikemujur.
“Ambika chunto, peminta nyadi kaban Opis Asil Dalam Negeri (LHDN), Perintah Sarawak udah ngenataika perambu chalun kaban ti ngarika Perintah Sarawak.
“Tu beguna amat kena nentuka Perintah Sarawak nemu gaya penuduk pekara wang menua, sereta mega beguna kena mantu pengeran Perintah Sarawak berandau enggau berundingka pasal pemeri khas ari baruh Pekara 112D Konstitusyen Perintah Besai,” ku iya.
Sharifah Hasidah madahka pekara tu lebuh ti nyaut tanya tambah ari Dato Ibrahim Baki (GPS - Satok) ba Hari Keempat Aum Kedua Penggal bekaul enggau peminta keterubah Kunsil Negeri Sarawak Ke-19 ti diatur ba Kompleks DUN Sarawak ditu, kemari.
“Taja pia ke penerang Yang Berhormat Satok, Perintah Sarawak bedau nerima timbal ari perintah besai bekaul enggau pekara ke disebut aku tadi,” ku iya.
Berebak enggau tu Sharifah Hasidah madahka empat pekara udah diputarka nengah Aum Kunsil Khas Bekaul enggau Sempekat Malaysia 1963, lalu iya keterubah, setuju engau randau entara Perintah Sarawak enggau Petronas nengah Commercial Settlement Agreement (CSA).
Kedua, ngaku hak
Sarawak ti minta chukai nyual produk petroleum lalu ketiga ngaku hak Sarawak nyaga enggau ngemata pengawa nyadung gis di Sarawak
Keempat, ngubah Pekara 1(2), 160(2) enggau 161A (6) enggau (7) ngagai Konstitusyen Perintah Besai, ti udah diteritka berengkah ari 11 Februari 2022, mega entara pekara udah diputarka nengah Aum Kaunsil Khas Mbekaul enggau Sempekat Malaysia 1963, ku iya.
“Kelimpah ari ubah Pekara 1(2), 160(2) enggau 161A (6) sereta (7), Perintah Sarawak udah ngenataika perambu ubah ba pekara bukai dalam Konstitusyen Perintah Besai.
“Ambika chunto, Perintah Sarawak udah merambu ubah ngagai ‘Senarai Perundangan’ ari baruh Tusun Ke semilan Konstitusyen Perintah Besai, kelebih agi kena ngubah ‘dagang temuai’ ari Pekara 25A dalam Rintai ( Rintai Perintah Besai, ngambi dilis nyadi siti ari pekara dalam Rintai III (Senarai Begulai),” ku iya nyaut tanya tambah ari Ibrahim.