Projek ngangkatmanah Loji Meresi Ai Maludam dikearap ulih ngurangka isu ai kamah
Sibu ngerikodka 13 kes pemati ketegal rabies dalam timpuh 17 bulan
Projek Ngangkatmanah ba Loji Meresi Ai Maludam dikearap ulih dipejalaika dikena ngurangka isu ai kamah ba kandang menua Maludam.
Dayang Noorazah Awang Sohor (GPS – Lingga) madahka, diatu peranak Maludam enggau Triso bisi loji rawatan air ti ulih mekalka 2.0 milion liter sehari bekal ai ngagai semua peranak ba kandang menua tu, taja pia peranak kandang menua tu sebana nerima kualiti bekal ai ti chukup kamah enggau bau ti ngujungka enda manah dikena tiap hari.
Iya madahka kena mansik pekara tu siti aum diatur kena 11 Mei 2922 begulai enggai Jurutera Opis Bekal Ai Menua Pesisir (JBALAB) Pelilih Menua Betong kena ngiga chara betapi enggau is utu.
“Asil ari pansik kitai nemu bisi dua pekara besai kebuah isu bekal ai kamah suah nyadi, keterubah, bekal elektrik enda chukup ngujungka proses rawatan air ba loji suah betapi penanggul nyentuk pengawa ngepam ai enda terawat disalur ngagai tangka aras tinggi.
“Kedua, kereja meresi tangka aras tinggi ketegal ti ngepam ai tidak terawatt enda ulih digaga ngena chara manual sereta begunaka bantu mesin khas.
“Berindik ari tu, sida Jurutera JBALB Pelilih Menua Betong udah ngenataika projek Upgrading Works At Maludam Water Treatment Plant ngagai ejensi perintah ngambi dipejalaika kena ngurangka isu ai kamah ba kandang menua tu,” ku iya.
Dayang Noorazah mantaika pekara tu maya bejuraika ‘Usul Penghargaan Atas Ucapan Tuan Yang Terutama Yang di-Pertua Negeri Sarawak’ ba Hari
Keempat Aum Kedua Penggal Keterubah Kunsil Negeri Sarawak Ke-19 ti diatur ba Kompleks DUN Sarawak ditu, kemari.
“Serata aku ngarapka projek tu ulih dikemendarka ari baruh ungkup belanja perintah negeri Sarawak enda lama agi,” ku iya.
Nambah nya, iya madahka isu catuan bekal ai enda chukup suah nyadi di kandang menua ulu enggau tebing tasik, lebih agi diatu Projek Skim Pembesaran Kampung ti majak nerima timbal manah ari peranak kandang menua DUN Lingga, catuan bekal ai beresi patut dikemanahka agi ari segi infrastrtuktur enggau teknikal kena napi peminta guna peranak menua tu.
Iya madahka diatu pukul rata bekal ai beresi semua kandang menua zon Lingga bepanggai ba tiga kandang endur Loji Ai iya nya Loji Rawatan Air Stumbin bekapasiti 0.65 milion liter sehari, Logi Rawatan Air Seduku bekapasiti 2.0 milion liter sehari enggau Loji Rawatan Air Lingga bekapaisiti 0.65 milion liter sehari.
Semua nya, ku iya, 3.3 milion liter sehari ulih dibekalka ngagai semua peranak ba kandang endur zon Lingga ti dianggar penyampau peranak bisi 5,832 iku.
“Tang, peranak kandang endur tu sebana bakal ai enda chukup nyentuk suah nyadi nadai bekal ai tiap ujung minggu.
“Nya alai diperambu ngambika Penilaian Semula Catuan Bekalan Air Bersih ba sitak DUN Lingga lebih agi ba kandang endur Pelilih Menua Lingga ti dipelaba deka ngembuan mayuh pemansang sosio-ekonomi enggau perengka guna mensia mayuh digaga ila,” ku iya.
SIBU: 13 kes pemati ketegal rabies dirikodka di Bagi Menua Sibu dalam timpuh Januari 2021 nyentuka 19 Mei 2022.
Komiti Mutarka Penusah Ngenyit Bagi Menua Sibu nengah siti penerang kemari madah, Pelilih Menua Sibu ngerikidka tujuh kes pemati, Selangau (empat) lalu Kanowit (dua).
Dua kes pemati iya nya ngaul nembiak ti baruh ari umur 12 taun iya nya bela beumur 11 taun enggau nembiak mit beumur 3 taun, lalu tu kes pemati ti pemadu biak udah dirikodka.
Penyampau kes pemati ti ngaul raban ke beumur entara 15 nyentuk 30 taun iya nya bisi tiga kes pemati iya nya bela beumur 16 taun. 17 taun enggau 21 taun.
Lapan kes pemati iya nya ngaul sida ti beumur 31 taun ke atas.
Bisi 12 kes iya nya bepun ari kes diketup ukui ke enda nerima vaksinasyen rabies.
Semina siti kes pemati ti kena ketup ukui ke udah dituchuk vaksin rabies iya nya ari ukui ke diinang, ukui ti bekedayau lalu diinang nyadika jelu tupi, ukui ti bisi orang ngempu tang ditejuka bekedayau di luar rumah sereta ukui ti bekedayau nadai orang ngempu.
“Semua kes pemati tu mega nadai nerima perubat bekau telih kena ketup ti patut.
“Kes pemati rabies mensia ulih diseliahka enggau ngemeranka chara baka ti dipadahka Opis Pengerai Bagi Menua Sibu baka nyeliahka diri ari ngambi ukui ti bekedayau nyadika jelu tupi, nentuka ukui tupi udah chukup dituchuk vaksin rabies lalu enda nejuka ukui bekedayau kediri diluar kandang endur diau.
“Kelimpah ari nya, beguai nuchi bekau kena ketup tauka keramak ukui enggau sabun tauka ai ti ngalir dalam 15 minit lalu pengudah nya nganjung enggau lengkas berubat di premis pengerai ti besemak lalu titihka jaku tangkan ari raban opis pengerai,” ku penerang nya.